BAUKAU, STLTIMORLESTE.com – Diretor Munisipal Unidade Servisu Deskonsentradu husi Ministeriu Komersiu no Industria (USD-MKI) Baukau, Duarte Luis Xavier hasai rasik osan hodi apoiu kombustivel ba funsionariu sira halao servisu iha terenu.
Diretor nee konta, motorizada neebe apoiu husi Governu ba USD-MKI Baukau hamutuk unidade tolu, daudaun ida para permanente iha edifisiu, tanba avaria, maibe laiha orsamentu atu halo manutensaun.
Nunee obrigatoriu loron dahuluk funsionariu ba kolekta dadus atividade komersiu no industria iha Postu Administrativu Baukau Vila no Laga, funsionariu neebe utiliza motorizada Governu hetan apoiu kupon kombustivel husi diresaun, enkuantu funsionariu neebe utiliza motorizada privadu, parte diresaun labele atribui kupon kombustivel, tanba razaun motorizada privadu.
“Ita hatene lei neebe mak iha, ita iha kupon ba kombustivel, maibe nee so ba motor neebe Governu, motor privadu la autoriza uza kupon, entaun oinsa mak sira lao, hau nuudar dirijente voluntariu apoiu sira tuir responsabilidade neebe iha,” hateten Duarte ba STL iha knaar fatin Vila Nova, Baukau, Kuarta (09/04/2025).
Nia akresenta, Munisipiu Baukau iha Aldeia 281, Suku 62 no Postu Administrativu 8, kuaze eziste atividade komersiu no industria no atu kobre Postu Ualu presiza fasilita hanesan transporte, maibe transporte limite no atividade kolekta dadus importante, tanba nee liu husi reuniaun konkordansia entre funsionariu no dirijente, deside hamutuk hodi fo solusaun.
Nia sublina, solusaun mak labele hein tuur deit iha edifisiu hodi kada fulan simu salariu, maibe tenke halo servisu, mezmu enfrenta problema, tanba atu fo resposta ba menus transporte no fasilidade seluk hahu husi luta.
“Nuudar Baukau oan, saida mak bele rezolve bele rezolve ho espiritu nasionalizmu, tanba ita hein, bainhira mak nasional apoiu sasan kompletu hotu, nee bainhira, tanba nee ami deside lao ba sambil ita hein,” Duarte argumenta.
Preokupasaun refere parte USD-MKI Baukau hatoo ona ba nasional, maibe seidauk iha rezultadu pozitivu, tanba aleinde fasilidade hanesan transporte laiha mos edifisiu propriu no daudaun utiliza edifisiu hamutuk ho diresaun meiu ambiental.
Entretantu funsionamentu iha USD-MKI Baukau hamutuk nain 10, kompostu funsionariu permanente nain 4 no kontratadu nain 6.
(tom)
