DILI, STLTIMORLESTE.com – Kargu Diretores no Xefia tenke servisu ho responsabilidade ba povu no Estadu Timor Leste (TL).
Hatete Ministra Saude (MS), Elia A. A. dos Reis Amaral liu husi nia diskursu iha serimonia tomada de pose ba kargu Diretores no Xefia nain 48 iha salaun Palasiu Sinzas Kaikoli, Tersa (15/10/2024).
“Ohin ita halo termu de entrega ba kargu diresun hamutuk nain 8, Xefia hamutuk 35 no seksaun nain 5 husi orgaun MS nian, neebe halao liu husi nomeasaun no subtituisaun hodi kontinua komitmentu boot husi IX Governu Konstitusionál atu haforsa funsaun publika hodi servisu diak liu tan ba estadu no povu sira iha ita nia rain,” hatete Elia.
Nia dehan, atu atinji rezultadu servisu ba prestasaun servisu sira neebe diak mak hatudu esforsu no dedikasaun espiritu servi husi lideransa saude, husi nivel nasional no autonomu sira tenke lao too iha area fasilidade saude neebe iha area remotas nian, hodi fo prestasaun saude neebe diak ba komunidade sira.
“Ba kargu Diretor no Xefia sira neebe mak halao servisu too ohin loron, hau hakarak espresa hau nia agradese nuudar reprezentante Governu ba setor saude nian, katak MS kontinua nafatin presiza ita boot sira nia matenek no dedikasaun ba servisu publiku, tan nee hau husu ba ita boot sira atu kontinua servisu ho diak hodi lori saude nee ba oin,” nia esplika.
Iha fatin hanesan, Empozada Mary Christavaria Bria, agradese ba Ministeriu Saude neebe mak tau fiar ba nia atu lidera Rekursu umanus iha MS.
(jen)
