DILI, STLTIMORLESTE.com – Sekretariu Estadu ba Igualdade (SEI) hamutuk Ministeriu Justisa halo diskusaun kona-ba revizaun ba lei Violensia Domestika (VD) iha ona faze final ba draf nia.
Feto Potensia, Maria Amaral ba jornalista STL iha nia knaar fatin Kaikoli, Sesta nee (13/03/2026) hatete, deklarasaun husi Governu liu husi SEI no Ministeriu Justisa deklara katak diskusaun revizaun lei Violensia Domestika iha ona faze final, ida nee informasaun diak.
“Ita hotu hatene Governu nomos sosiedade sivil sira halo esforsu makaas oinsa halo revizaun ba lei Violensia Domestika no tuir informasaun iha ona faze final, tempu badak haruka ba Konselhu Ministru (KM), ida nee informasaun diak,” katak nia.
Nia hatete, tinan kotuk Governu hamutuk ho sosiedade sivil mos halo diskusaun no aprezenta ona ba Sekretaria Estadu ba Igualdade nomos Ministeru Justisa, no daudaun nee iha ona faze final, espera buat hotu bele lao ho diak tuir saida mak luta husi Governu liu husi SEI no Ministeriu Justisa nomos sosiedade sivil sira.
Nunee mos Diretor Jeral husi Sekretariu Estadu ba Igualdade, Armando da Costa hatete, revizaun ba iha lei Violensia Domestika, SEI hamutuk ho Ministeriu Justisa too ona iha faze final ba draf nia.
“Iha draf nee ami remata ona, aprezenta tiha ona ba Sekretariu Estadu ba Igualdade no Ministru rasik iha ona sirkulasaun draf nee ba iha ministeriu save sira implementador sira, agora ekipa juridiku iha Ministeriu Justisa finaliza hela. Espera iha tempu badak bele haruka ona ba iha Konselhu Ministru,” dehan DJ.
Lei nee iha alterasaun balun, tanba nee mak halo revizaun no daudaun nee SEI ho Ministeriu Justisa iha hela diskusaun ida kona-ba oinsa integra asuntu kona-ba insestu neebe iha lei kontra violensia domestika antes la kobre. Nunee mos relasiona ho atendimentu seluk iha lei nia laran.
“Hau la lembra, maibe iha artigu lubuk ida mak ita halo nia revizaun hamosu mos artigu foun balun,” katak nia.
Tinan kotuk Diretor-Jeral SEI, Armando da Costa no Diretor Jeral Polítika ba Justisa, Honorio Aureliano Soares Magalhães ho ekipa jurídiku husi Ministeriu Justiça no SEI nian hamutuk ho Parseiru Sosiedade Sivíl Internasional no Nasional hanesan TAF-Nabilan, Fokupers, ALFeLa, Fundasaun Alola no JSMP kontinua diskute revizaun ba Lei Kontra Violensia Domestika (LKVD) iha salaun enkontru Ministeriu Justisa, Kolmera, Díli.
Objetivu diskusaun nee mak atu rekolha hanoin sira hodi kontribui ba iha revizaun esbosu LKVD nian.
Lei Kontra Violensia Domestika nee eziste ona durante tinan sanulu resin, nunee presiza atu halo revizaun, nunee mos atu konsidera no kriminaliza kazu insestu sira iha lei nee rasik hodi bele halo prevensaun violensia domestika no kazu insestu sira iha rai laran.
Objetivu husi Lei Kontra Violensia Domestika iha Timor Leste mak atu prevene, proteje no kombate violensia domestika. Lei ida nee aprova iha tinan 2010 liu husi Lei Nú. 7/2010, loron 7 fulan Julhu, defini violensia domestika hanesan krime publiku no fo obrigasaun ba Estadu atu prevene violensia, proteje vítima no oferese asistensia ba sira.
(eme)
