DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguida ho inisial LAM hanesan feen, neebe halo agresaun hasoru lezadu inisial MSdCP hanesan laen.
Iha provas sufisiente katak, ofendidu moris hamutuk ho arguida hanesan feen no laen iha tinan 2021.
Iha loron 17 fulan Setembru tinan 2022, arguida lori liman rakut ofendidu nia kakorok karuk dala ida, arguida rakut ofendidu nia knosen ruin parte karuk dala ida.
Konsekuensia husi arguida nia hahalok, ofendidu hetan moras kanek iha liman kukun fatin, kanek moras mean no raan sai iha knosen.
Arguida halo ho forma livre, hatene hela katak nia hahalok nee lei bandu maibe halo nafatin.
Tanba nee.Ministeriu Publiku akuza arguida komete krime Violensia Domestika ho Forma Ofensa Integridade Fizika Simples, neebe previstu iha artigu 145 husi Kodigu Penal, konjuga ho lei Violensia Domestika numeru 07/2010 loron 07 fulan Dezembru.
Hatan ba akuzasaun nee arguida deklara katak, faktus neebe akontese iha akuzasaun loos hotu.
Arguida deklara, momentu neeba mosu diskusaun tanba arguida ho lezadu nia oan, sira nia oan iha hela foho ho lezadu nia banin sira, tanba nee mak arguida mos koalia ba lezadu atu lori labarik mai iha Dili.
Arguida deklara, iha diskusaun nee la iha solusaun, tanba nee lezadu lori uluk kipas baku ba iha arguida no tebe arguida. Ho ida nee mak arguida nervozu hodi rakut lezadu.
Arguida rekonhese rakut duni lezadu, maibe ba kazu ida nee momentu neeba lezadu mos baku arguida tanba nee keixa kontra keixa.
Arguida deklara, depois akontese tiha problema sira diak malu fali no agora la iha tan problema ona.
Tribunal konfirma ba iha lezadu no lezadu mos rekonhese arguida rakut duni lezadu no lezadu mos baku arguida, tanba nee keixa kontra keixa.
Lezadu deklara, agora sira diak malu ona no la iha tan problema.
Rona tiha parte rua, iha alegasaun Prokurador Bartolomeo de Araujo deklara katak, ba prosesu ida nee laos deit arguida maka baku lezadu, maibe lezadu mos baku arguida.
MP husu Tribunal tetu, tanba oras nee dadaun arguida no lezadu diak malu ona, husu Tribunal tetu atu aplika pena ba arguida.
Enkuantu husi parte Defensor Publiku nian, husu Tribunal atu aplika pena neebe justu, tanba arguida konfesa imparsial.
Rona tiha alegasaun, Tribunal adia ba loron seluk hodi tama ba iha faze desizaun.
Audensia julgamentu nee, prezide husi Juiz Singular Arjentino Nunes, Ministeriu Publiku reprezenta husi Prokurador Bartolomeo de Araujo, arguidu hetan asistensia legal husi Defensor Publiku Fernando da Costa.
(ter)
