DILI, STLTIMORLESTE.com – Servisu ekipa entre Edukasaun Munisípiu Bobonaro, mentor no inspetor eskolar kada loron kontrola aprendizajen no identifika profesores tama eskola tarde, tanba distansia sira nian hela fatin dook husi eskola.
“Kona-ba prosesu ensinu aprendizajen ba ita nian eskola sira, ami iha nee prontu garantia, primeiru ba mentor sira, tanba mentor sira nee ita nian esperansa boot ba sira, tanba sira nian servisu nee kapas tebes-tebes, depois sira nian prezensa iha eskola sira ajuda ita nian profesores sira, depois halo kontribuisaun ba iha planu lisaun, mai fali iha avaliasaun,” dehan Diretor Servisu Edukasaun Munisipiu Bobonaro, Miguel Freitas ba jornalista STL, Kinta nee (05/03/2026).
Nia dehan, monitorizasaun ba iha prosesu ensinu aprendizajen ninia nee ba iha inspetor eskolar sira, tanba inspetor sira mos lao, kada loron sempre halo monitorizasaun ba eskola sira, nunee mos husi edukasaun halo vizita duni ba eskola idak-idak.
“Monitorizasaun nee iha oin tolu, ida husi mentor, inspetor no husi Edukasaun Munisipiu rasik, tanba servisu ekipa tolu neebe ohin mensiona nee halo kontrolu aprendizajen kada loron iha eskola sira, mentor no inspetor sira nee loron-loron,” nia informa.
Miguel akresenta, liu husi kontrolu ba aprendizajen nee sira identifika katak, prosesu aprendizajen nee lao diak, tanba prezensa mentor sira nian ajuda buat barak, maibe iha dezafiu neebe mak hanesan inspetor sira hetan nee, dala ruma profesores sira too eskola sempre atraza 10 minutus 7 minutus, sira sempre hasoru ida nee, nee distansia hela fatin ho eskola mak dook.
Iha fatin seluk, Diretor Servisu Edukasaun Munisípiu Manatuto, Patricio da Cruz Quintao dehan, inspetor eskolar sira monitoring ba atividades hotu iha eskola, hanesan aprendizajen, merenda eskolar no seluk tan.
(jac)
