DILI, STLTIMORLESTE.co — Dili Institute of Technology (DIT) iha tinan akademiku 2025 simu estudante foun hamutuk rihun ida atus lima (1500) no produs tan matenek nain 254 neebe sei gradua iha loron 10 Maiu 2025.
Vise Reitor ba Asuntu Akademiku DIT, Dr. Aderita Takeleb Dos Santos, ST., M.Eng, hatoo kestaun nee ba STL iha Kampus Sentral DIT, Aimutin, Dili, Sabadu (3/5/2025).
Tuir Aderita, serimonia graduasaun lisensiatura ba dala 21 no graduasaun ba Programa Mestradu Master of Business and Management/MBA ba dala 8 nee sei realiza iha Salaun OKA, Surik Mas, Dili, Sabadu (10/05/2025).
Aderita mos esplika katak total graduadu sira neebe sei simu titulu akademiku iha loron moris DIT nian nee hamutuk ema nain atus rua lima nulu resin hat (254) mai husi Kampus Sentral Dili no Kampus Regional Enclave Oekusi (DIT KREO).
Husi total ida nee, School of Engineering and Science (ema nain 72), School of Petroleum Studies (ema nain 42), School of Business and Management (ema nain 93), ho School of Tourism and Hospitality (ema nain 41) no Programa Mestradu Master of Business and Management/MBA (ema nain 6).
Nia hatete katak tema ba graduasaun lisensiatura ba dala 21 no graduasaun ba Programa Mestradu Master of Business and Management/MBA ba dala 8 no Dies Natalis ba dala 23 mak “Dezenvolve Kualidade Ensinu Superior liu husi Transformasaun Dijital ho Internasionalizasaun baze ba Fiar, Etika, Moral no Kultura”.
“Tema nee ninia sintidu nee katak iha era dijital agora ita sira neebe mak sai hanesan ensinu superior tenke habelar no haburas sistema dijital ida nee nomos internasionalizasaun. Servisu hamutuk ho rai liur, ita nia ensinu superior bele iha naran iha rai liur, laos deit iha rai laran, ita halo peskiza hamutuk, hanorin hamutuk. Maibe, ita tenke tama iha era dijital nian. Parte rua nee importante tebes ba ensinu superior atu hadia sira nia kualidade,” dehan Aderita.
Maibe, keta haluha katak nasaun ida-idak iha ninia fiar, etika no kultura. Nunee, maske iha dijital, maske iha naran iha rai liur, maibe tenke hametin nafatin fiar, etika no kultura hodi hasae kualidade ensinu superior.
Nia mos esplika katak antes halao serimonia graduasaun, iha loron 8 Maiu 2025, sei halao serimonia enseramentu ba Reitor Cup iha Kampus DIT atu fosai rezultadu semak sai manan nain iha eventu Reitor Cup nee.
“Iha eventu Reitor Cup nee, departamentu hotu-hotu envolve iha laran, estudante sira halao atividade hanesan desportu, public speaking, banda muzika, show tais no sel-seluk tan. Eventu Reitor Cup nee halao iha fulan ida nia laran,” hatete Aderita.
Ba finalista sira neebe atu husik ona ninia almamater DIT, Aderita reprezenta civitas akademika DIT hatete katak siensia neebe hetan husi DIT duran tinan hirak nia laran hanesan bukae ida neebe bele lori sai ba liur hodi aplika siensia no esperiensia neebe hetan durante estudu iha DIT.
“Ita sai ema laos deit ho konhesementu no esperiensia neebe as, maibe hahalok, atitudi, etika no fiar tenke hatudu iha liur. DIT laos hanorin deit siensia, maibe DIT haburas nafatin atitude, etika, fiar no kultura,” tenik Aderita.
Simu Estudante Foun 1.500
Kona-ba estudante foun neebe DIT simu iha tinan akademiku 2025, Aderita esplika katak DIT simu estudante hamutuk ema nain rihun ida atus lima (1.500).
“Tuir lolos ami prepara fatin ba ema rihun ida deit. Ami la espera katak estudante sira neebe mai rejistu iha DIT liu rihun ida. Inan-aman sira mak lori rasik sira nia oan mai DIT. Ami atu la simu mos ladiak, tanba balun to’o tanis hakarak sira nia oan halao estudu iha DIT. Nunee, ami tenke aumenta sala hanorin no aumenta mos dosente sira,” katak Aderita.
Agora dau-daun DIT iha dosente permanente hamutuk atus ida sianulu resin ualu (198) no estudante ativu hamutuk rihun hitu atus lima (7.500).
(mik)
