AMBENO, STLTIMORLESTE.com – Dili Institute of Technology (DIT) Realiza Seminar iha Oecusse ho tema “Estratejia Dezenvolvimentu Micro Pequenas Emprezas no Impaktu ba Kreximentu Ekonomia Rejional Tinan 2025-2030”.
Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu ba STL hafoin sai orador prinsipal iha seminariu nee iha Salaun Rejional Edukasaun no Solidariedade Sosial Santa Rosa Suku Costa, Postu Administrativu Pante Makassar, RAEOA Kuarta (28/01/2026) dehan, ohin DIT organiza estudante sira husi departementu Finansas no Ekonomia, realiza seminariu ida ligadu ho emprendedorizmu.
“Hau hanoin seminariu ida nee importante atu habelar governu nia politika, kona ba movimentu emprendedorizmu Oecusse ba nivel akademiku sira, tanba nee institusionalmente ita apoiu, ita nakloke no hakarak kolabora ho instituisaun akademiku sira, hanesan DIT, Universidade da Paz (UNPAZ) no Universidade Nasional Timor Lorosae (UNTL) hanesan universidade estadu nian, atu bele pas parte enkuadramentu no implementasaun inisiativa, primeiru halo mudansa mindset ba ita nia povu neebe maioria agrikultura, atu hanoin ba emprendedorizmu,” dehan PA-RAEOA, Regio da Cruz Salu.
Nia haktuir tan katak, Primeiru Ministru (PM), Kay Rala Xanana Gusmão hanesan Entidade Tutelar no Superintendente ba RAEOA mos aseita kona ba emprendedorizmu iha Oecusse.
“Ita hotu hatene katak, ita PM Kay Rala Xanana Gusmão hanesan mos entidade tutelar no superintendente ba RAEOA mos aseita ho emprendedorizmu, tanba nee ita bele hahu no kontinua dadaun hodi prepara aan, orientasaun ba merkadu,” dehan nia.
Nia dehan, iha seminariu nee interesante atu koalia ho Universidade sira no ohin komprementidu ona katak fulan oin, sei ba aprezenta mais detalhu kona ba inisiativa ba orientadu programa nee, foku ba saida, nunee estudante universidade sira serbisu foku ba pratika laboratoriu iha kampus, koloka sira ba iha grupo kooperativas neebe sei sai benefisiariu ba programa emprendedorizmu iha terenu, ba area peskas, Agrikultura, Pequaria, Agro-florestas, Industria tranformasaun seluk-seluk tan.
“Tanba nee, ita sei hahu ho mudansa mainset fo konfiansa ba kada familia agrikultor neebe iha natar, kafe, karau, nia iha kapital tanba pas parte iha grupo kooperativas, maibe seidauk iha transformasaun ida tanba vida emprendedorizmu sedauk mosu, mesmu sira iha hanoin no hakarak, entaun ita tenke hahu ho mainset.
Iha biban nee, Diretor Dili Institute of Technology Kampus Rejional Oecuse (DITKREO), Drs. João Muni liu husi diskursu, agradese ba Prezidente Autoridade RAEOA neebe akompanha estudantes universitariu sira.
“Ita agradese ba PA-RAEOA neebe akompanha ita universidade sira, fo ninia palestra kona ba estratejia dezenvolvimentu Micro Pequenas Emprezas ninian, tanba nee nuudar dosente hamriik iha nee, nuudar esforsu akademiku ninian, atu fo ninia kontribuisaun, konhesimentu ba estudantes sira hotu, liu-liu sira neebe iha parte finansas no acountabilidade ho jestaun tomak, Mikro Pequenas emprezas ba ekonomia, sai hanesan baze fundamental, neebe moris iha sosiedade nia leet, Governu rejional mos iha politika rasik ba emprendedorizmu,” dehan Drs. Joao Muni.
Nia akresenta, Oecusse hetan tratamentu espesial, liu-liu kona ba ekonomia, funda husi sosiedade kiik ho ekonomia kiik iha sosiedade, pessoal iha grupo nia laran. Haree husi obstaklu makro ekonomia nian, sempre iha situasaun ekonomia, maibe husi ekonomia kiik sira sai hanesan unidade ida neebe iha forsa maibe iha mos ninia problemas rasik.
“Hau fo Bemvindo ba PA-RAEOA, neebe sai orador prinsipal iha seminariu ida nee kona ba estratejia dezenvolvimentu Microequenas Emprezas no impaktu ba kresimentu ekonomia Rejional tinan 2025-2030,” dehan Diretor DITKREO.
Iha biban nee Diretor Rejional Comersiu Industria Oecusse, Orlando Quelo sai mos orador iha seminariu nee, koalia kona ba desizaun praktis, husi Ministeriu Comersiu Industria (MCI), hodi garantia atividades Micro Pequenas Emprezas iha Partisipa iha seminariu nee Mai husi Estudante universitariu sira husi Fakuldade Ekonomia, Departamentu Finansas DIT Sentral no DIT Kampus Rejional Oecusse no Sosiedade Civil, Xefe Departamentu sira no seluk seluk tan.
(jos)
