DILI, STLTIMORLESTE.com – Tinan nee Dili Institute Of Technology (DIT) hetan subvensaun publika husi Ministériu Ensinu Superior Siensia no Kultura (MESSK), no osan refere sei uza ba iha programa prioridade tolu.
Reitor DIT, Salustiano dos Reis Piedade dehan, tinan nee DIT simu tan subvensaun publiku US$ 123, 750, 080.
“Tinan ida nee ami iha tan subvensaun publika husi DIT, ami hetan US$ 123, 750, 080. Nee total orsamentu neebe mak ami hetan husi subvensaun publika, neebe hetan apoiu husi MESSK,” esplika nia ba STL Segunda nee (15/09/2025).
Nia hatutan, husi orsamentu nee uza ba programa tolu, ida mak ba apoiu estudantes hamutuk US$ 22.000. Depois apoiu ba dosentes nee iha US$ 56.000, ikus liu nee ba atividades hotu hamutuk orsamentu US$ 45.750.
“Kona-ba ami nian ezekusaun ba osan nee, tanba osan nee foin mak tama. Entaun ami ezekuta seidauk too 20 %, maibe atividades hotu planeadu. Fulan ida nee lao ona no balun fulan oin lao tan, tanba osan nee foin tama,” nia afirma.
Iha parte seluk, Leao Borges nuudar Reitor Institute Ciensia Saude (ICS) hatete, sira nia subvensaun nee sai tiha ona no sei tau prioridade ba area tolu mak apoiu dosentes, estudantes no atividades transversal.
Asuntu tolu nee mak sai prioridade, bainhira uza subvensaun nee.
Jornalista: Jacinta Sequeira
Editora: Domingas Gomes
