DILI, STLTIMORLESTE.com – Relasiona ho publiku sira nia preokupasaun kona-ba deskonfia mosu broker iha Servisu Rejistu Notariadu, Diretor Jeral (DJ) Agustinho Gonsalves Viera deklara, la iha toleransia kuandu funsionariu ida sai broker no se mak haree labele nonok deit, tenke hatudu provas.
Tuir Diretor Rejistu Notariadu, Agustinho Gonsalves Viera katak, se ema ruma haree kona-ba broker, labele koalia deit ho ibun maibe lori provas ba hatudu.
“Se provas iha lori ba iha neeba, no hatudu ema ida neebe sai broker mak nee. Se mak dehan broker iha tenke hatudu faktus, labele koalia deit ho ibun, tanba nee la tolera kuandu funsionariu sai broker,” dehan Agustinho ba STL iha Mandarin, Kuarta (19/03/2025).
Nia hatutan, zero toleransia, la tolera la fo fatin ba funsionariu iha laran nee sai broker, se mak hatene hatudu faktus, se koalia la lori provas nee bosok.
Durante nee rona deit ema dehan broker, maibe seidauk haree ho matan broker nee mak se, tanba nee seidauk haree ho matan labele dun ema ida dehan broker. Tanba nee husu atu se deit mak haree ema balu pratika aktu broker, labele nonok hatudu provas.
Iha fatin hanesan, Akademiku UNTL, Rafael de Jesus dehan, funsionariu sira tenke halao servisu tuir regra neebe iha, hodi atende ema hotu hanesan.
“Funsionariu sira tenke halao servisu ho diak, hodi atende ema hotu hanesan, tanba ema barak mak presiza duni tarata dokumentus hodi viajen no buka servisu,” dehan nia.
(ter)
