BAUKAU, STLTIMORLESTE.com – Inisiu fulan Janeiru too Maiu 2025, Diresaun Munisipal Transporte Komunikasaun (DMTK) Baukau la realiza ezame karta kondusaun kareta nian ba motorista sira, tanba laiha pesoal ezaminador.
Diretor DMTK Baukau, Mariano Pinto da Costa esplika, DMTK Baukau la fo ezame no teste ba kliente motorista sira neebe trata karta kondusaun kareta nian, inisiu kedas husi fulan Janeiru 2025 too Maiu nee, tanba laiha pesoal ezaminador.
“Hahu husi Janeiriu nee ami seidauk bele halo ezame ba kareta nian, agora ami faze rejistu deit,” hateten Diretor DMTK Baukau, Mariano Pinto da Costa ba STL iha knaar fatin Uatulete, Baukau, Segunda (12/05/2025).
Nia sublina, mezmu pesoal ezaminador ba ezame karta kondusaun kareta nian iha DMTK Baukau laiha, maibe atendimentu kontinua ativu hodi simu no rejistu kliente sira, tanba ekipa nasional fo orientasaun, Diresaun Munisipal simu kliente too nain 400 hafoin realiza ezame dala ida iha nivel Munisipiu.
Maibe numeru tarjetu ba ekipa Nasional seidauk too, nunee kliente sira neebe rejistu, hahu husi fulan Janeiriu too Maiu nee seidauk tuir ezame no teste.
“Husi Janeiru too mai iha Maiu nee ami rejistu hamutuk 200, tarjetu nee too ona ami sei halo pedidu ba Nasional haruka ezaminador sira mai fo ezame iha Munisipiu,” Marino Pinto da Costa akresenta.
Diretor nee katak, DMTK Baukau mos respeita desizaun kliente nian, bainhira trata karta kondusaun ho urujente sei relata dadus no haruka kliente ba tuir ezema no teste iha Dili.
“Total ami rekomenda ba Dili urjente hamutuk 153, sira tuir teste hotu fila mai foti karta kondusaun iha Baukau,” Mariano Pinto da Costa konta.
Tuir Diretor nee katak, kliente sira rejistu iha Baukau ba tuir ezame no teste iha Dili fo impaktu ba kliente sira, tanba kestaun distansia husi Baukau ba Dili.
“Ami halo ona proposta ba Ministeriu, ami nafatin tenta sira resposta katak sei prepara formasaun ba ita nia ema sira,” Mariano Pinto da Costa informa.
Diretor nee deklara, problema ezaminador ba teste karta konduzaun kareta nian iha DMTK Baukau laiha, nia parte esforsu relata ona problema sira ba ministeriu kompetente neebe tuir planu sei responde iha tempu besik.
(tom)
