DILI, STLTIMORLESTE.com – Diresaun Nasional Edukasaun Inkluzivu Asaun Sosial Eskolar (DNEIASE) simu pedidu foun eskola neen (6), neebe hetan estragus husi udan no anin boot, maibe eskola tolu (3) apoiu ona material no tolu (3) seluk sei faze preparasaun.
Liafuan nee hatoo husi Direitor Nasional Edukasaun Inkluzivu Asaun Sosial Eskolar (DNEIASE) iha ME, Fernando Soares ba jornalista STL, Kuarta nee (11/03/2026).
“Ami simu pedidu ba ita nian eskola neebe mak hetan estragus husi udan no anin boot, nee ita simu pedidu neen (6), ida husi MunisÃpiu Bobonaro, ida husi Ainaro no balun husi Munisipiu Lautem no ida seluk husi Dili, ninia parte EBF ida iha Metinaro, maibe ninia kondisaun estragus nee ladun grave ida, tanba nee ita nian parte tekniku sira ba halo verifikasaun iha terenu atu nunee ita bele fo apoiu emerjensia ba ita nian eskola neebe hetan estragus,” nia dehan.
Fernando dehan, eskola neebe mak hetan estragus nee tolu (3), ME liu husi sira nian diresaun fo ona apoiu materia emerjensia hanesan pregu, kalen, besi baza, ho nunee bele hadia hikas eskola hirak neebe mak hetan ona estragus husi anin no udan durante nee.
“Ita nian eskola tolu (3) ita apoiu ona material, agora falta eskola tolu (3), neebe mak agora daudaun ami nian parte tekniku sira sei prepara hela materia emerjensia para bele apoiu ba ita nian eskola tolu (3) neebe seidauk hetan apoiu, maibe tolu (3) seluk hetan ona apoiu,” nia haktuir.
Iha fatin seluk, Diretor Servisu Edukasaun Munisipiu Likisa, Julio da Silva dehan, kona-ba eskola hetan estragus husi udan no anin, too ohin loron husi Edukasaun Likisa seidauk simu informasaun ruma husi direjente eskola sira, nee duni bainhira laiha informasaun husi sira, entaun iha Likisa dadus eskola hetan estragus laiha.
“Hau hanoin kona-ba eskola hetan estragus husi udan no anin, too ohin loron husi Edukasaun Likisa seidauk simu informasaun ruma husi direjente eskola sira, nee duni bainhira laiha informasaun husi Sira,entaun iha Likisa dadus eskola hetan estragus laiha, tanba too agora hau seidauk simu informasaun ruma neebe mai husi ita nian eskola sira,” nia afirma.
(jac)
