DILI, STLTIMORLESTE.com – Ministeriu Edukasaun (ME) liu husi Diresaun Nasional Edukasaun Inkluzivu Asaun Sosial Eskolar (DNEIASE) tinan nee sei halo identifikasaun ema ho defisiensia fiziku iha Ensinu Sekundariu Jeral no Pre Eskolar inklui Tekniku Vokasional (Tekvo).
“Agora ita fo hela informasaun ba eskola sira, ita atu hahu nee iha ensinu Pre Eskolar ho Ensinu Sekundariu Jeral ninia, tanba foin daudaun liu ba nee ita iha ensinu baziku deit, maibe ita seidauk kobre hotu, agora Pre Eskolar ho sekundariu nee liu husi formatu EMIS nee, ba tinan ida nee prioridade ita foin atu hahu ba ensinu rua pre eskolar no sekundariu,” nia afirma.
Lia hirak nee hatoo husi Diretor husi Diretor Nasional Edukasaun Inkluzivu Asaun Sosial Eskolar (DNEIASE) iha ME, Fernando Soares ba STL iha nia knaar fatin Vila Verde, Segunda nee (17/03/2025).
Nia akresenta, nee atu rekolha EMIS nee, tanba ninia problema oituan mak tenke fo esplikasaun oituan ba manorin sira para atu halo levantamentu nee, tanba anteriormente nee ba ema ho defisiensia matan, tilun, neebe mak hodi bele haree, agora hirak neebe labele haree nee, nee presiza identifika.
“Defisiensia neebe mak labele haree nee ita presiza akompanha iha sala laran, intervista sira halo didiak mak ita foin detekta, tanba nee ita sei halo identifikasaun ba ensinu sekundariu inklui mos tekvo hotu,” nia dehan.
Iha fatin seluk, Diretor Servisu Edukasaun Minisipiu Manatuto, Patricio da Cruz Quintão dehan, ida nee Diresaun Edukasaun Inkluzivu husi nasional nian kompetensia, oinsa atu halo identifikasaun ba estudantes defisiensia neebe mak asesu edukasaun formal.
(jac)
