DILI, STLTIMORLESTE.com – Diresaun Nasional Edukasaun Inkluzivu Asaun Sosial Eskolar (DNEIASE) sei halo atualizasaun dadus estudantes defisiente iha Ensinu Sekundariu Tekniku Vokasional, Ensinu Sekundariu Jeral no Edukasaun Pre Eskolar.
Haktuir Diretor Diresaun Nasional Edukasaun Inkluzivu Asaun Sosial Eskolar (DNEIASE), Fernando Soares ba jornalista STL iha nia knaar fatin, Kuarta nee (14/05/2025).
“Ensinu baziku antes nee ita halao tiha ona, nee ita halao ona iha munisipiu balun ona, agora ita atualiza dadus ba ensinu sekundariu, pre eskolar, agora proposta foin mak hetan aprovasaun, hein halo hela planu para hodi tun ba iha munisipiu. Semana oin foin halo kalendariu, agora munisipiu ida neebe mak uluk, nee depende ba ita nian planu iha kalendariu,” nia argumenta.
Fernando dehan, bainhira ekipa ida ba halo sensibilizasaun kona-ba fulan Janeiru nian iha Munisipiu Bobonaro hein sira fila no semana oin mak sei halo kalendariu, bainhira halo ona kalendariu, nee hahu halao atualiza dadus ba eskola sira, liu-liu ba nível eskola neebe ohin mensiona.
Iha fatin seluk, Diretor Eskola Sekundariu Nobel da Paz Jeremias P. de Jesus dehan, eskola ida nee labarik defisiente mos iha, maibe sira nee husi eskola fo gratuita ba sira, kada fulan sira la selu propinas, halo atualizasaun dadus defisiente iha eskola, nee kompetensia husi Ministeriu Edukasaun, liu-liu husi diresaun neebe toma konta ba asuntu ida nee.
“Ami nian eskola ida nee labarik defisiente mos iha, maibe sira nee husi eskola fo gratuita ba sira, kada fulan sira la selu propinas, halo atualizasaun dadus defisiente iha eskola nee kompetensia husi Ministeriu Edukasaun, liu-liu husi diresaun neebe toma konta ba asuntu ida nee,” nia afirma.
Nia dehan, estudantes defisiensia sira nee eskola gratuita, nee duni sira la selu propinas kada fulan, oinsa mak sira bele asesu edukasaun hanesan ho sira nian maluk sira seluk, tanba sira iha direitu ba eskola.
(jac)
