DILI, STLTIMORLESTE.com – Diresaun Nasional Edukasaun Inkluzivu Asaun Sosial Eskolar (DNEIASE) iha planu sei halo formasaun ba lideransa husi eskola no Ekipa Jestor Programa (EJP).
Belchior Maria Almeida Barros hanesan Xefe Departamentu Programa Merenda Eskolar iha Ministeriu Edukasaun hatoo kestaun nee ba jornalista STL iha nia knaar fatin Vila Verde, Segunda nee (07/07/2025).
“Agora daudaun ami sei enkontru hela ho MAE no MS kona-ba atu fo formasaun ba lideransa husi eskola no EJP sira, seidauk determina atu fo orientasaun ba kuzineira, diretor no koordenador EBF sira, tanba ami sei aprezenta proposta ba Ministra Edukasaun hodi husu autorizasaun, sei iha orientasaun ba kada postu. Semana oin ami aprezenta ona ami nian proposta ba Ministra,” dehan nia.
Nia dehan, formasaun ba lideransa eskola nee hahu husi Koordenador Pre-eskolar, EBF no Diretor EBC sira, inklui EJP neebe tein programa merenda eskolar ba estudantes sira, oinsa sira bele prepara hahan neebe diak ba estudantes sira.
Nunee mos Diretor EBC Manleuana, Carlos Correia hatete, uluk sira tuir ona formasaun kona-ba lalaok implementasaun programa merenda eskolar iha eskola sira, formasaun nee husi ministeriu mak fo.
“Uluk husi parte ministeriu fo ona formasaun mai ami direjente sira, formasaun refere kona-ba implementasaun programa merenda eskolar ninia, oinsa mak atu implementasaun programa nee ho diak liu tan iha eskola,” nia esplika.
Iha parte seluk, Diretor Servisu Edukasaun Munisipiu Ainaro, Patricio da Costa Magno dehan, kona-ba sensibilizasaun husi ME ba tinan nee seidauk halao, liu-liu sensibilizasaun kona-ba implementasaun merenda eskolar ninia, tanba ida nee kompetensia husi Ministeriu nian, liu husi diresaun neebe haree asuntu refere.
“Hau hanoin kona-ba sensibilizasaun husi ME ba tinan nee seidauk halao, liu-liu sensibilizasaun kona-ba implementasaun merenda eskolar ninia, tanba ida nee kompetensia husi Ministeriu nian liu husi diresaun neebe haree asuntu refere,” dehan nia.
(jac)
