DILI, STLTIMORLESTE.com – Diresaun Nasional Edukasaun Inkluziva no Asaun Sosial Eskolar (DNEIASE) sei fo orientasaun ba fornesedor merenda eskolar no Dirijenti Eskola sira hanesan Diretor no Koordenador Eskola.
Xefi Departamentu Programa Merenda Eskolar iha Ministeriu Edukasaun (ME), Belchior Maria Almeida Barros dehan, kontiudu husi orientasaun nee koalia liu konaba hahan seguru sira nee, intermus de sira nian preparasaun, oinsa atu haree hahan sira no oinsa identifika modo tahan sira neebe maka fresku no ikan neebe fraku, tanba lakohi labarik sira han aihan neebe kontaminadu, liu-liu modo neebe namlaek ona.
“Ita presiza halo orientasaun ba sira, atu nunee sira bele kompriende oinsa atu prepara aihan neebe diak ba ita nian oan sira, tanba nee ita atu halo orientasaun ida nee sei hein proposta ida nee, para ami bele halao ona orientasaun ida nee ba ita nian fornesedor no direjente sira husi eskola,” katak nia ba jornalista STL, Segunda (01/09/2025).
Nia hatete, proposta neebe halo seidauk hetan aprovasaun, ohin sae ba halo konfirmasaun, tanba buat nee Ministeriu tolu maka halao no presiza haree kontiudu sira iha laran, tanba nee ohin hadia fali no haruka sae ba. Nee duni sei iha prosesu nian laran.
“Ami nian proposta rasik seidauk hetan aprovasaun. Ami fo orientasaun ba deit grupu fornesedór sira EJP, kuzineira, Diretur no Kordenador Eskola sira, maibe orientasaun nee seidauk fo, tanba sei iha prosesu nian laran,”nia afirma.
Iha fatin seluk Koordenador Pre Eskolar Sagrada Família Vila Verde, Cornelio A.Soares dehan, fornesedór neebe tein ba estudantes sira han nee nain ida deit, no durante nee hetan formasaun ruma liga ba implementasaun merenda eskolar nee, hodi oinsa prepara hahan ba estudantes sira han.
Jornalista: Jacinta Sequeira
Editor: Domingas Gomes
