DILI, STLTIMORLESTE.com – Tinan nee Diresaun Nasional Edukasaun Inkluzivu Asaun Sosial Eskolar (DNEIASE) seidauk halao sensibilizasaun ba programa merenda eskolar, tanba hamutuk ho Estatal no Ministeriu Saude sei halo revizaun ba programa refere.
Afirma Diretor Diresaun Nasional Edukasaun Inkluzivu Asaun Sosial Eskolar (DNEIASE) iha Ministeriu Edukasaun, Fernando Soares ba jornalista STL iha nia knaar fatin Vila Verde, Tersa nee (06/05/2025).
“Agora ita sei halo hela revizaun ba manual neebe atividades sira sei para hela, depois de manual nee hetan ona aprovasaun mak ita bele hahu halao fali sensibilizasaun ba iha programa merenda eskolar iha eskola sira. Tinan ida nee ita seidauk halao hotu, tanba ita sei halo hela revizaun ba manual nee,” nia komenta.
Fernando hatutan, bainhira halo revizaun manual nee remata, husi MS, Estatal no ME hetan aprovasaun mak foin sensibiliza, agora halo hela revizaun ba manual, bainhira hotu mak bele halao sensibilizasaun.
Iha fatin seluk, Kordenador EBF no 5 Komoro, Marcelino Moniz de Araujo hatete, agora daudaun programa merenda eskolar lao diak hanesan baibain, no menu lao tuir iha manual neebe mak iha, tanba nee estudantes sira asesu ba programa nee lao ho diak.
“Ami nian estudantes hamutuk 2 mil resin mak agora daudaun asesu ba programa merenda eskolar, menu neebe mak uza ba programa nee lao tuir iha manual neebe mak iha ona no la ses husi ida nee,” nia dehan.
Nunee mos Direitor Servisu Edukasaun Munisipiu Liquica, Julio da Silva dehan, merenda eskolar Likisa nian lao diak hela, orsamentu merenda ami la bele proposta liu husi orsamentu neebe templet orienta, tenke redus dias kada trimester se bele foti deit 37 dias.
“Hanoin ita nian programa merenda eskolar iha Munisipiu Likisa lao diak hela, orsamentu merenda eskolar ami la bele proposta liu husi orsamentu neebe templet orienta, tenke redus dias kada trimester bele foti deit 37 dias,” katak nia.
(jac)
