DILI, STLTIMORLESTE.com – Diresaun Nasional Edukasaun Inkluzivu Asaun Sosial Eskolar (DNEIASE) halo sensibilizasaun edukasaun inkluzivu ba Direjente Eskola hahu husi pre eskolar, ensinu baziku, sekundariu no tekvo.
Direitor DNEIASE, Fernando Soares dehan, dadaun halo hela sensibilizasaun edukasaun inkluzivu ba direjente husi eskola sira iha Munisípiu Manufahi.
“Agora dadaun ami halo hela sensibilizasaun edukasaun inkluzivu ba ita nian direjente husi eskola sira iha Munisípiu Manufahi, ba ita nian direjente husi pre eskolar, ensinu baziku,.sekundariu no tekniku vokasional. Sensibiliza ba sira para bele kompriende konaba edukasaun inkluzivu ninia. Sensibilizasaun nee ita halo loron ida ou rua,” dehan nia ba STL, Kinta (11/12/2025).
Tuir Fernando, durante nee DNEIASE halao ona sensibilizasaun iha Munisipiu barak. Ba oin sei kontinua kobre ba iha munisípiu seluk, hodi nunee direjente husi eskola sira bele kompriende atu rekoila dadus ho ema defisiente neebe mak asesu ona edukasaun formal.
Iha parte seluk Diretor Eskola Sekundariu Nobel da Paz, Jeremias P. de Jesus hatete, kada tinan defisiente sira mai kontinua estudu iha eskola ida nee, tanba sira iha direitu asesu ba iha edukasaun formal.
“Oinsa ita nian maluk defisiente sira nee bele asesu ba edukasaun formal hanesan ho sira nian maluk sira seluk, tanba sira iha direitu asesu ba edukasaun no ami haruka eskola gratuuta iha nee,” nia dehan.
Jeremias hatutan, maluk defisiente nee balun iha nibel sekundariu no balun iha nibel ensinu baziku. Sira hamutuk nain 10 nunee mak eskola iha Nobel da Paz, tanba kada tinan sempre ida rua mai eskola iha nee.
Jornalista: Jacinta Sequeira
Editora: Domingas Gomes
