DILI, STLTIMORLESTE.com – Diresaun Nasional Edukasaun Inkluzivu Asaun Sosial Eskolar (DNEIASE) fo ona apoiu material emerjensia ba eskola 2 no pedidu 10 resin sei iha faze verifikasaun.
Haktui Diretor Nasional Edukasaun Inkluzivu Asaun Sosial Eskolar (DNEIASE), Fernando Soares ba STL iha nia knaar fatin Vila Verde, Kuarta nee (02/04/2025).
“Pedidu lubuk ida neebe tama mai ona, pedidu nee rasik mai husi Munisipiu lubuk ida, Ermera, Aileu, Bobonaro, Ainaro no Vikeke, ita halo ona monitorizasaun no balun ita hahu halo distribuisaun, balun iha etapa ida verifikasaun no semana oin mak bele haree tuir,” dehan nia.
Nia hatutan, semana oin mak nia atu haree kondisoins, eskola rua mak hetan apoiu husi ME no balu sei iha raze verifikasaun, apoiu material emerjensia mak hanesan kalen, besi, baut no pedidu 10 resin nee sei iha faze verifikasaun.
Iha fatin seluk, Diretor Servisu Edukasaun Munisipiu Ainaro, Patricio da Costa Magno dehan, kona-ba EBF ida iha Maubisi hetan estragus nee, husi ministeriu nasional apoiu ona material emerjensia hanesan kalen ho pregu.
“Ami nian EBF ida iha Maubisi nee hadia tiha ona, tanba ita hetan ona ajuda material hanesan kalen no pregu husi ME nasional,” nia komenta.
Nunee mos Diretor Servisu Edukasaun Munisipiu Likisa, Julio da Silva hatete, kona-ba eskola estragus husi udan no anin, nuudar Diretor Edukasaun Munisipal too agora seidauk simu informasaun ruma mai husi eskola sira, kuandu laiha informasaun nee laiha eskola neebe estragus.
(jac)
