DILI, STLTIMORLESTE.com – Hahu husi Julhu too mai Novembru tinan nee, Diresaun Nasional Ensinu Sekundariu Jeral (DNESG) atende ema neebe legaliza ona diploma hamutuk 3361.
Asuntu nee hatoo husi Diretor Nasional Ensinu Sekundariu Jeral iha ME, Benjamin Gomes da Cruz Fernandes ba STL iha nia knaar fatin, Kuarta nee (27/11/2024).
“Diresaun Nasional Sekundariu Jeral Legaliza diploma nee laos servisu ida loron-loron tenke halo loron-loron, nee mak hahu husi Julhu tinan nee ami atende ona ema 699. Iha Agostu mak aas liu 1330, Setembru 509, Outubru 482, Novembru nee too mai ohin loron ami foin hetan 541. Total husi fulan lima nee hetan ema neebe legaliza ona diploma nee hamutuk 3361,” nia esplika.
Nia dehan, loron-loron sira uza karik ema neebe mak urjenti bele foti kedas, kuandu la urjenti, tanba diploma nee barak, entaun fo ohin aban mak bele foti. Kuandu urjenti ruma nee tenke fo justifikasaun neebe klaru ba sira, tanba barak mak dehan urjenti, maibe asina tiha la mai foti diploma.
(jac)
