BAUKAU, STLTIMORLESTE.com – Diresaun Nasional Regulasaun Bee no Saneamentu (DNRAS-sigla português) provizoriu identifika ona bee matan hamutuk 316 iha Munisipiu Baukau no tuir planu sei relata ba parte relevante sira atu kanaliza ba komunidade sira.
Informasaun nee hatoo husi Xefe Departamentu Jestaun Rekursu Bee, José Ribeiro Perreira ba jornalista sira iha salaun apuramentu Vila Nova Baukau, hafoin remata relata dadus peskiza ba Autoridade Suku no Postu, Tersa nee (23/12/2025).
“Bazeia ba dadus neebe mak ita iha hamutuk 316 pontus mak ita identifika ona no ita aprezenta ona iha suku balu mak ita seidauk identifika hotu, maibe iha tinan 2026 bele identifika kompleta liu tan numeru neebe agora ita iha,” José informa.
Nia esplika, dadus refere ekipa DNRAS hamutuk ho Servisu Munisipal Agua no Saneamentu Baukau inklui ho Bee Timor Leste Empreza Publiku (BTL, EP) halo levantamentu durante semana 3 iha Postu Administrativu 6 kompostu Postu Baukau Vila, Vemasi, Venilale, Kelikai, Laga no Vemasi la inklui Postu foun 2 hanesan Kelikai Antigu no Matebian, maibe husi postu 6 neebe ekipa kobre ona seidauk too iha suku balu, tanba nee sei kontinua iha tinan 2026 hodi kompleta dadus bee matan neebe iha.
Nia informa, husi bee matan neebe ekipa halo levantamentu dadus kompostu husi bee matan permanente, lagoa, bee mota no perfurasaun neebe eziste iha parte kosteiru.
Nia sublina, liu husi levantamentu dadus ba bee matan hirak nee no analiza bele kanaliza ba komunidade sira neebe sei infrenta problema bee moos, maibe depende ba Autoridade relevante sira.
Tanba nee atu termina tinan 2025 DNRAS relata dadus levantamentu ba Autoridade Munisipal, Postu no Suku nunee halo preparasaun liu husi relata ba parseiru dezenvolvimentu no Ministeriu relevante atu kanaliza bee moos ba komunidade sira bainhira prezisa.
“Dadus agora iha nee DNRAS mak sei halo jestaun hamutuk ho SMASEA bainhira ita nia parseiru ou Ministeriu relevante prezisa mak ita foin fornese, maibe kona-ba informasaun jeral ita bele distribui ona relatoriu ida nee ba Munisipiu, Postu no Suku sira,” José katak
Iha fatin hanesan Xefe Suku Tekinomata, Abílio Diamantino Ximenes agradese ba ekipa DNRAS nia esforsu liu husi halo levantamentu dadus ba ezistensia bee matan iha Baukau neebe rezultadu hatudu bee sufisiente atu kanaliza ba komunidade sira no konsidera dadus levantamentu refere ajuda tebes Suku atu relata ba Nasional bainhira iha nesesidade.
“Bazeia ba ekipa nia detektasaun direita normalmente rezultadu neebe ohin sira aprezenta nee bele ona fo benefisiu ba ita,” Diamantino katak.
Xefe Suku Tekinomata nee husu parte atu esforsu kobre bee matan sira hotu atu kanaliza ba komunidade sira hodi nunee la halerik ona ba bee moos, tanba iha area barak komunidade sei infrenta problema bee moos mezmu bee matan eziste hela, maibe seidauk halo kanalizasaun.
Entretantu atividade lansa relatoriu levantamentu dadus bee matan realiza iha salaun apuramentu Vila Nova Baukau no hetan partisipasaun husi Autoridade Munisipiu, Postu no Suku.
Jornalista: Tomas Reis
Editor: Xisto Mendonça
