LAUTÉM, STLTIMORLESTE.com – Diresaun Nasional Rejistu Notariadu (DNRN) lori programa trata asuntu dokumentu hanesan Bilhete Identidade (BI) no Pasaporte hakbesik ba komunidade iha area remotas, atu trata sira nia preokupasaun sira ho efetivu.
“Husi DNRNL mai ho planu no lema ida atu lori programa hanesan trata dokumentu hodi hakbesik ba komunidade iha area remotas, liu-liu iha Postu Administrativu Luro, Iliomar nian, nunee ema neebe ho kondisaun vulneravel no ema ho defisiensia bele trata sira nia dokumentu,” dehan Diretor husi Diresaun Nasional Resjitu Notariadu, Amandio Alves ba STL iha Lospalos Vila, Tersa (07/01/2025).
Maibe nia dehan, planu ba trata dokumentu nee hakbesik ba komunidade sira iha area remotas, tanba komunidade balu nee atu mai trata dokumentu mos ho distansia neebe dook liu, Governu liu husi DNRN hakarak alarga programa ida nee ho diak.
Tanba programa nee durante halo ona, nunee hakarak atu alarga liu tan programa refere, tanba sentru DNRN Munisipiu Lautém nian iha sentru Lospalos, entaun husi Postu Administrativu sira hanesan Luro no Iliómar nee dook liu, nunee imposivel atu komunidade sira bele mai trata sira nia dokumentu ho diak.
Iha parte seluk, komunidade husi Iliomar, nuudar Estudante iha Universidade Dili (UNDIL), area Relasaun Publika, Fitonio dos Santos katak, programa nee husi rejistu notariadu hakarak alarga programa sira mai hakbesik ba povu, liu-liu atu trata komunidade nia dokumentu sira hanesan BI, pasaporte no sertidaun, no dokumentu sira seluk, nee atu halo ba komunidade sira.
Tanba fatin iha area remotas sira liu-liu iha Iliomar, Suku Kaenliu no iha Luro Lakava, komunidade sira nee imposivel atu loron-loron mai trata dokumentu iha Lospalos Vila, tanba distansia liu, nunee tuir planu Governu liu husi Rejistu Notariadu Munisipiu Lautém, alarga programa nee ba komunidade nee importante tebes, neebe presiza aselera.
Entretantu Diretor Sekretariu Tekniku Administrasaun Estatal (STAE) iha Munisipiu Lautém, Sergio Belmonte hatete, planu lori programa trata dokumnetu hanesan BI no Kartaun Eleitoral hodi hakbesik ba povu no komunidade sira iha ona prosesu, tanba nee tuir planu sei funsiona servisu sira nee iha kada Postu Administrativu sira atu besik komunidade hodi halo no trata sira nia dokumentu.
Tanba programa ida nee kleur ona, durante halo ona, neebe trata ba komunidade sira neebe ho idade idozus liu, ema ho defisiensia sira, STAE mak too fatin hodi trata nia dokumentu, nunee nia bele hetan nia direitu sira, liu-liu simu no oportunidade ruma husi Estadu Timor Leste.
(EST 1)
