DILI, STLTIMORLESTE.com – Polisia Nasional Timor Leste (PNTL) liu husi Departamentu Nasional Tranzitu no Seguransa Rodoviária (DNTSR) sei aplika koima ba transporte sira neebe para la tuir regras, atu nunee bele hamenus engarrafamentu iha sidade Dili.
“Ba oin nee implementasaun ita para veikulu la tuir regras nee, ita sei aplika koima,” hatete Komandante Tranzitu Seguransa Rodaviaria Nasionál, Superintendente Asistente, Luis da Costa ba jornalista sira iha nia knaar fatin Komando Jeral PNTL, Kaikoli, Dili, Kinta (06/02/2025).
Nia esplika, karreta membru Governu balu mos Polisia Tranzitu prende lori mai iha Komando Jeral, depois nain mai selu multa.
“Ita so hakruk ba lei, tanba nee Diresaun Tranzitu Rodoviariu ami hakruk ba lei, ami laiha interese, tanba nee ami hakarak garante ema hotu nia sirkulasaun bele livre,” nia informa.
Iha fatin ketak, Akademista UNPAZ, Fakuldade Direitu, Deolindo José Silva dehan, nuudar sidadaun Timoroan, hotu-hotu iha deireitu atu asesu ba estrada, tanba nee membru Governu sira lori karreta Estadu ou provadu tenke para tuir regras neebe Polísia Tranzitu monta ona.
“Ita haree realidade sempre akontese iha sidade Dili mak membru Governu barak mak kontra regras neebe ita nia Polisia Tranzitu monta ona, katak fatin ida nee labele para karreta ou motor iha nee, maibe ita kontinua para nafatin, tanba nee husu ba sidadun hotu-hotu tenke iha konsiensia para tuir regras neebe iha,” nia afirma.
(jen)
