DILI, STLTIMORLESTE.com – Komando Polisia Nasional Timor Leste (PNTL) liu husi Departamentu Nasionál Tránzitu no Seguransa Rodoviária (DNTSR) sei implementa koimas ba Transporte neebe para la tuir regras neebe iha.
“Agora implementasaun ba oin nee, ba transporte sira neebe para la tuir regras ita sei aplika koimas,” hatete Komandante Departamentu Tranzitu no Seguransa Rodoviariu Nasional, Superintendente Asistente, Luís Costa ba jornalista sira iha Komando Jeral PNTL, Dili, Tersa (04/03/2025).
Nia dehan, dala barak kareta Governu balu para la tuir regras, tanba nee Polisia Tranzitu sempre avizu no monta ona sinais tranzitu iha fatin refere.
“Ita haree kareta Governu balu para la tuir regras, ita foti mai tau iha nee sira tuir mai hodi selu iha Banku, ami so hakruk deit ba lei, ami laiha interese, tanba atu garante ema hotu nia sirkulasaun bele lao livre, ” nia esplika.
Iha fatin ketak, Kondutór Abilio Deus Fatima informa, kareta ho motor sira nee sempre para la tuir regras, tanba nee akontese engarrafamentu iha fatin-fatin, tanba nee husu ba Departamentu Nasionál Tránzitu no Seguransa Rodoviária (DNTSR) tenke implementa koimas.
“Ita tenke implementa ona koimas ba transporte privadu no ba kareta Estadu nia neebe sempre para la tuir regras, atu nunee hamenus engarrafamentu iha sidade Dili, tanba engarrafamentu nee halo ema sempre hetan asidente,” nia afirma.
(jen)
