DILI, STLTIMORLESTE.com – Diresaun Nasional Transporte no Terestre (DNTT) no Diresaun Tránzitu Seguransa Rodoviaria Nasionál (DTSRN) hasai ona sirkular, husu ba loja sira neebe seidauk iha fatin estasionamentu atu rekruta ofisial parajen sira, hodi bele organiza parajen iha loja oin sira iha kapital Dili.
Nia tenik, sirkular neebe mak fo sai tiha ona, bazeia ba rezultadu enkontru neebe PNTL parte tranzitu no DNTT halao ho loja nain 15 Abril tinan kotuk, liga ho loja sira neebe mak daudaun nee laiha estasionamentu.
Nia dehan, loja sira neebe laiha fatin estasionamentu ba kompradores sira, nunee loja nain sira rekruta sira nia ofisial parajen atu nunee organiza parajen iha loja oin.
“Sirkular ida nee ita fo sai tiha ona, los duni katak loja sira balu sira rekruta tiha ona ofisial, maibe tuir monotorizasaun DNTT nian katak, seidauk maximu, entaun ita hasai sirkular ida foun fila fali ba iha loja sira nee hotu, atu nunee sira neebe mak iha ona ofisial parajen sira bele organiza parajen iha sira nia loja oin,” hatete Diretora DNTT, Maria Antonia Vitor da Costa ba jornalista sira iha knaar fatin Balide, Kinta (26/02/2026).
Nia deklara, ba loja sira neebe mak seidauk iha ofisial parajen, DNTT orienta sira bele rekruta ofisial parajen atu nunee bele organiza parajen iha sira nia loja oin.
Nia informa, sirkular nee fo sai ho prazu fulan ida ba iha loja sira atu bele rekruta ofisial parajen sira.
“Ita haree katak, loja barak mak laiha fatin estasionamentu propriu, entaun ita hasai sirkular nee atu sira bele kumpri, nunee organiza parajen iha sira idak-idak nia loja oin,” katak nia.
Enkuantu, loja sira balu hanesan SEARA nia oin no balu iha audian nian laiha fatin estasionamentu, dala ruma komprador sira ba kompras uza veikulus para deit iha estrada ninin hamosu engarrafamentu iha loja oin.
“Ita husu ba loja nain sira ho sirkular neebe ita hasai sira bele organiza ka estabelese fatin parajen, wainhira sira laiha ona fatin sira bele organiza atu nunee veikulus sira bele para loja nia oin. Ezemplu hanesan SEARA nia oin no loja balu iha Audian atu sira bele rekruta ofisial atu nunee sira bele organiza parajen”, nia koalia.
Nia mos husu komprador sira bainhira ba kompras iha loja oin sira neebe identifika laiha parajen atu labele para loja oin sira, tanba sira la estabelese fatin parajen.
“Iha sansaun ba loja nain sira neebe kontra ordem autoridade dekretu lei kodigu estrada, ita bele fo sansaun ba loja nain sira la kumpri ordem autoridade. Sansaun kontra ordem autoridade sei aplika multa US$ 45,” nia hatutan.
Nia deklara, sirkular neebe mak DNTT ho Diresaun Tranzitu hasai nee ba oin mak loja sira la kumpri rekruta ofisial parajen sira mak sei aplika multa ba sira.
“Objetivu sirkular ida nee husu loja nain sira rekruta ofisial parajen iha loja oin sira, nunee ofisial parajen sira nee mak tenki organiza motor ka kareta neebe mak atu halo kompras sira nia loja oin sira”, nia informa.
Tanba nee ho sirkular nee fo sai ona, ba oin DNTT nafatin motoriza ba iha loja sira, sira neebe mak iha ona ofisial parajen kontinua no sira neebe seidauk nafatin husu ba iha sira atu rekruta ona ofisial parajen sira.
“Ami kontinua monotoriza, depois sirkular nee sai ami seidauk simu difikuldade ruma, ba loja sira neebe seidauk iha ofisial parajen ami nafatin fo hanoin ba sira, nunee lalais rekruta ona ofisial parajen,” nia koalia.
Nia argumenta, hanoin loja barak mak iha ona ofisial parajen, hanesan iha Hudi Laran neeba, maibe tuir monotorizasaun DNTT nian seidauk organiza ho maximu, entaun ho sirkular ida fo sai atu sira organiza ho maximu.
Iha parte seluk, Diretor Diresaun Tránzitu Seguransa Rodaviariu (DTSRN), Superientendente Xefe Polisia, Antoninho Mau Luta fundamentan tan katak, antes nee fo avizu sai ba loja sira katak, atu rekruta ofisial parajen iha loja oin sira, nunee ofisial parajen sira nee mak tenki organiza motor ka kareta neebe mak atu halo kompras sira nia loja tenke para iha parajen.
“Ami sei servisu hamutuk ho DNTT atu halo atuasaun iha terenu bainhira sira la kumpri karik ami sei halo atuasaun no prega multa ba sira idak-idak,” nia deklara.
Nia afirma, bainhira ema neebe atu kompras iha loja mak motor ou kareta para iha estrada ami sei aplika multa.
(jen)
