DILI, STLTIMORLESTE.com – Diresaun Nasional Transporte Terestre (DNTT) hamutuk Diresaun Tranzitu Seguransa Rodoviáriu Nasional (DTSRN) hahu ona prende motor ho karreta neebe mak para iha estrada publiku para liu 5 minutus.
Tuir Motorista Januario Sarmentu katak, DNTT – DTSRN implementa lei refere atu ba ema hotu no husu ba motorista sira hotu para tuir sinais neebe mak iha ona.
“Husu atu lei nee regula ema hotu, maibe ba hau nee importante tebes, hau prontu atu kumpri tuir lei, no husu ba maluk hotu-hotu ba kondutor ou kareta nain neebe mak atu mai iha Sidade Dili karik lao ho kuidadu no kumpri sinais neebe autoridade seguransa sira fo sai liu husi media sira,” hateten Januario ba jornalista sira iha prasa proklamasaun Dili, Segunda nee (07/04/25).
Nia dehan, ohin nia para la tuir regras, nunee kona infrasaun konsege multa ona US$ 60, tanba nee nia parte nafatin deklara hodi prontu kontribui no kumpri sinais neebe mak iha.
Aleinde nee, Diretor Diresaun Tranzitu Seguransa Rodaviario, Superintendente Asistente Polisia, Luis Da Costa informa, nafatin bazeia ba avizu neebe mak fo sai ona katak, intesaun husi Ministru Transporte no Komunikasaun (MTK) hahu loron 7 Abril nee sei lansa pilotu ida hodi haree efetividade engarrafamentu ba iha dalan protokolu nee oinsa para bele iha redusaun.
“Ohin ita hahu implementasaun ba avizu neebe iha, husi Diresaun Rotunda Nikolau Lobato too iha Ponte BJ Habibie, husu ema hotu-hotu atu labele para kareta liu husi 5 minutu,” hateten Luis.
Nia hatutan, nee fila ba ema hotu, karik ba oin mak mosu violasaun ruma no la kumpri sei prende tranporte sira no lori ba DiresaunTranzitu Seguransa Rodaviariu. No bainhira para la tuir avizu neebe mak iha, Polisia Tranzitu sei halo prende no selu koima tuir kodigu estrada lei nú 6/ 2003 iha artigu 4 neebe mensiona katak, bainhira la kumpri ordem autoridade sei multa masimu US$ 45. Tanba lei nee bale ba ema hotu no sei la iha separasaun ba infradores entre transporte sidade Dili no husi foho mai iha Dili.
Tuir observasaun jornalista STL iha terenu observa katak, daudaun nee transporte karreta ho motor balun sei kontinua para liu 5 munutus no balu muda husi estrada publiku para iha trotoar leten, liu-liu iha Super Merkadu sira.
(EST 3)
