BAUKAU, STLTIMORLESTE.com – Bispu Dioseze Baukau, Dom Leadro Maria Alves hatete, Orsamentu Jeral Estadu neebe oras nee liu ona jeneralidade iha Parlamentu Nasional bele lori esperansa ba povu.
Bispu Dioseze Baukau, Dom Leadro Maria Alves hatoo kestaun nee ba jornalista STL bainhira inaugura kapela Liasidi neebe pertense iha Suku Wailili, Sabadu (08/11/2025) hatete, Parlamentu Nasional aprova ona Orsamentu Jeral Estadu 2026 iha jeneralidade ho votus sein kontra, ida nee hanoin neebe diak, maske iha pro no kontra maibe sira nia intensaun hakarak diak ba povu, tanba nee Dom Leadro hatoo parabens ba povu no deputadu sira.
Iha biban nee Dom Leadro hatete, ho orsamentu Jeral Estadu 2026 presiza hadia ba povu nia diak no lori esperansa ba povu.
“Membru parlamentu sira, ita hatene katak oras nee debate orsamentu jeneralidade liu tiha ona, importante mak hotu-hotu rona, katak hotu-hotu hakarak diak ba povu nee duni, mezmu iha kritika maibe buat hotu konsertiva, kritika konsertiva neebe bele fo hanoin ba malu oinsa diak ba povu no moris ida nee mak importante, nee duni parabens ba ita nia povu no parabens ba Parlamentu Nasional neebe mak halao ona sira nia knaar ida nee, hodi fo hanoin ba malu lori povu nia naran, sira mos tun ba iha baze haree ba realidade neebe mak iha,” dehan bispu.
Bispu hatete, deputadu sira iha uma fukun Parlamentu Nasional reprezenta povu, tanba nee tun ba iha baze hodi haree direita saida mak povu sira hasoru iha moris loron-loron, hodi bele ba debate iha parlamentu, nunee ho Orsamentu Jeral Estadu 2026 tulun povu.
“Ho orsamentu 2026 bele tulun ita nia povu no bele lori propriedade ba ita nia povu,” dehan Bispu.
Nunee mos Padre Manuel da Silva Ximenes hatete, deputadu sira iha uma fukun Parlamentu Nasional sira nee reprezenta povu, tanba nee bainhira halo diskusaun iha parlamentu tenke hatudu atitude neebe diak.
“Kuandu iha maturidade politika, buat saida deit mak diskute iha parlamentu nia laran, maske ideas diferente maibe nafatin ho konsiensia ba povu nia diak, laos ba interese partidaria, individual maibe diskute buat neebe diak ba povu,” dehan Padre.
Padre hatutan, iha parlamentu, deputadu sira labele hatudu atitude ho violentu, maibe kredibilidade nuudar reprezentante povu, figura publika ida moris iha sosiedade no nasaun nia laran.
“Hau nia lian haraik aan komprende malu, maske ideias la hanesan iha diskusaun nee normal, maibe laos ho violensia, maibe hapara no hakribi violensia,” katak Padre.
Nunee mos iha loron 7 fulan Novembru, Parlamentu Nasional aprova ona OJE 2026 iha jeneralidade ho votus afavor 42, kontra 0 no abstensaun 23, lema investe iha transformasaun nasional integrasaun rejional no dezenvolvimentu inkluzivu, no OJE 2026 estabelese orsamentu total bilhaun US$ 2,291.
Jornalista: Emerenciana Pinto
Editor: Xisto Mendonça
