BAUKAU, STLTIMORLESTE.com – Bispu Dioseze Baukau, Dom Leandro Maria Alves hatete, inan aman nia papel importante eduka oan hadook husi hahalok aat sira, hodi moris sai naroman ba ema seluk.
Dom Leandro Maria Alves hatoo kestaun nee liu husi nia omilia, bainhira prezide misa eukaristia iha Kapela Liasidi, Sabadu (08/11/2025).
Dom Leandro hatete, Maromak husu ema hotu sai misionariu no Misionaria sai naroman hodi haklake domin, hahu liu husi familia oinsa mak iha familia koalia ba oan sira labele halo violensia no labele halo hahalok neebe estraga fali ema seluk buka hases husi hahalok aat sira.
“Hanorin ita nia oan sira respeita ema seluk, hanorin ita nia oan sira atu hases aan husi hahalok aat sira, hanorin ita nia oan sira labele baruk ten, hanorin oan sira hatene hadomi malu, perdua malu, haree malu diak, ida nee mak ita nia knaar hanesan sarani neebe Ita nain Jesus husu mai ita nee,” dehan Dom Leandro.
Bispu Dioseze Baukau nee hatutan, iha salmo hatete, “Hau mak nee halo tuir ita hakarak katak, ema oferese aan ba nai Maromak atu halo tuir nai Maromak nia hakarak,”hatete Bispu Dioseze Baukau nee.
Maromak halo ema hotu tuir Dom Leandro sai naroman katak sarani sira sai naroman hodi leno naroman ba maluk sira, se moris iha nakukun laran lao ba malu lahetan malu besik besik malu mos lahetan malu no lakoinese malu, no sidi arbiru maibe Naroman mai halo ema bele hateke ba malu hareem alu koinese malu.
“Maromak husu ba ita sira nee hotu sarani sira hotu atu sai naroman hodi naroman kmanek ba ema seluk, Naroman neebe ita hatudu sai ba ita nia maluk sira seluk mak oinsa? Naroman ida neebe ita leno hatudu ba maluk sira nee mak ita hahalok ida diak nee, hahalok ida hatene hadomi malu nee hahalok ida hatene perdua malu nee. Hahalok ida haree malu ho diak hanesan maun ho alin ida nee mak dehan naroman, nemak Maromak hakarak husi ita,” dehan Dom Leandro.
Tanba dala barak temi misionariu no misinaria nee hanoin ba Padre no Madre deit katekista pois haluha aan rasik nuudar sarani, lolos nee sarani nemak sai misionario misionaria, bainhira simu Batismo simu knaar ida nee atu haklake.
“Nee duni ita nuudar sarani ita simu ona batismo knaar ida nee mai iha ita, Jesus fo knaar ida nee mos mai ita atu ita ba haklake, haklake maromak nia futar liafuan, haklake Maromak nia hahalok sira, Maromak nia hahalok ida neebe ita hatene nain Maromak nia domin nemak hahalok ida hadomi haree malu diak, perdua malu ida nee mak importante tebes liu liu iha ita nia moris loron loron nia,” dehan nia.
Nia hatutan, ohin loron presiza fo hanoin malu tanba iha rai laran halo buat oin oin, Governu oras nee halo irigasaun tama sai iha fatin sira nee futuru haburas ema nia moris, maibe husu ema idak idak mos presiza halo serbisu.
“Maromak fo mai ita rai mesak bokur deit, maromak fo mai ita rikusoin sira nee rai nee hotu hotu riku soin iha neeba bee mos iha rai mesak bokur maibe oinsa mak ita buka atu kolabora no serbisu hamutuk ho nai Maromak hodi utiliza no uza didiak rai nee bai ta nia moris diak, tanba nee labele baruk buka badinas hodi servisu iha ita nia rai neebe mak Nai Maromak haraik ba ita,” dehan Bispu.
Jornalista: Emerenciana Pinto
Editora: Carme Ximenes
