BAUKAU, STLTIMORLESTE.com – Bispo Diozese Baukau, Dom Leandro Maria Alves husu komunidade sira atu kolabora iha implementasaun projetu reabilitasaun estrada urbana Baukau Vila no projetu konstrusaun Merkadu Munisipal Baukau.
Projetu reabilitasaun estrada urbana Baukau Vila tempu naruk komunidade sira hein atu implementa lalais, tanba kondisaun aat, maibe infelizmente Governu liu husi Ministeriu Obras Publikas (MOP) konsege implementa ona iha loron 06 Fevereiru 2026, neebe ofisialmente Primeiru Ministru (PM) Kay Rala Xanana Gusmão rasik mak hatuur fatuk dahuluk ba projetu estrada refere iha Vila Antiga Baukau.
Bispo Diozese Baukau, Dom Leandro Maria Alves hateten, iha seremonia hatuur fatuk dahuluk nee komunidade sira hotu hotu kontente, tanba projetu refere komunidade sira hein kleur, maibe Governu responde ona, tanba nee husu ema hotu nia kolaborasaun iha projetu refere.
“Husu ita hotu-hotu nia kolaborasaun, ita hatene katak dezenvolvimentu nee atu lao lalais no diak ita hotu partisipa, laos deit ita nia kompanhia, maibe ita hotu partisipa tuir buat neebe ita iha,” Bispo Diozese Baukau, Dom Leandro Maria Alves hateten ba jornalista sira iha Vila Antiga Baukau, Segunda (16/02/2026)
Dom Leandro husu ema hotu nia kolaborasaun iha projetu refere, tanba dala ruma iha komunidade sira nia ai-horis afetadu iha implementasaun projetu refere, maibe atu projetu refere lao diak no hotu sedu, prezisa Autoridade sira kria dialogu nunee labele iha asaun impede tempu servisu nian iha terrenu.
Maibe Tuir Dom Leandro katak, implementasaun projetu reabilitasaun estrada urbana Baukau Vila, Baukau oan hotu kolabora no hakarak dezenvolvimentu lao iha Munisipiu Baukau, maibe atu projetu refere lao diak liu tan, mak husu Baukau oan tenke fo liman ba malu.
“Buka fo liman halo dialogu ho maneira neebe diak, atu nunee hotu-hotu ho fuan neebe mak boot, kakutak malirin hodi buka dalan neebe mak diak ba ita hotu, liu-liu aselera dezenvolvimentu iha Baukau,” Dom Leandro rekomenda.
Aleinde nee mos, iha loron 12 Fevereiru 2026, Governu liu husi Ministeriu Komersiu no Industria (MKI) implementa ona projetu konstrusaun Merkadu Munisipal Baukau neebe ofisialmente fatuk dahuluk hatuur husi Vise Primeiru Ministru Mariano Assanami Sabino neebe akompanha husi Ministru Komersiu no Industria no Prezidente Autoridade Munisipiu Baukau no entidades seluk tan.
Implementasaun projetu sira nee, Bispo Diozese Baukau, Dom Leandro Maria Alves konsidera, Governu iha maneira oin-oin lori Timor-Leste ba oin liu husi prosesu dezenvolve infraestrutura bazika no hatuur Munisipiu Baukau nia imajen nafatin segundu iha Timor-Leste.
“Ida nee buat ida diak teb-tebes, tan nee mak husu populasaun sira buka atu kolabora tulun maluk sira neebe servisu. Ita mos rona tan parte bee nian atu dada fahe ba Baukau, ita hein katak ita nia halerik sira nee, ita nia nai ulun sira haree no rona, komesa hatan ona halerik sira nee, neebe husu mak ita nia kolaborasaun,” hateten Dom Leandro.
Bispo Diozese Baukau nee husu ba entidades sira iha Munisipiu Baukau, aleinde kolabora iha implementasaun projetu reabilitasaun estrada urbana Baukau Vila, kolabora mos implementasaun projetu konstrusaun merkadu Munisipal, tanba asaun kolaborasaun mak nuudar meius ida atu servisu sira finaliza tuir kontratu neebe estabelese, nunee bele fo oportunidade ba projetu bee moos neebe tuir planu Governu sei implementa tan iha Munisipiu Baukau.
Entretantu tuir dadus neebe STL iha, estrada urbana Baukau Vila neebe daudaun lao hamutuk kilometru 23, neebe pakote I (Seksaun 00+000-02+880.0) Hospital Nagardjo – Baukau (Hospital Rejional Eduardo Ximenes), Munisipiu Baukau ho kontratu SSS/007/MOP – 2026, durasaun servisu fulan 24. Projetu nee fiskaliza husi Ministeriu Obras Publikas ho montante orsamentu US$ 4,735,021.55, responsabiliza hosi empreza Jova Construction Unipessoal Lda (Timor-Leste). Pakote II (Seksaun 1 – 5), Munisipiu Baukau Kontratu: SSS/008/MOP – 2026, durasaun servisu fulan 24, montante orsamentu US$ 3,764,933.21 fiskaliza husi Ministeriu Obras Publikas, kontrator Vage’el Unipessoal Lda (Timor-Leste).
Projetu konstrusaun merkadu Munisipal Baukau tuir dezenhu neebe STL asesu, konstrusaun nee sei kompleta uma ba negosiante sira, iha estrada diresaun tama no sai, portaun 4 ho fatin seguransa, terminal, fatin parajem ba kompradores inklui jardin ho utilizasaun rai ba konstrusaun hektare 3.
Konstrusaun merkadu Munisipal Baukau nee, Governu aloka orsamentu liu husi fundu infraestrutura hamutuk US$ 7,139,218.43 implementa liu husi kontraktor Fujian Yongtai Constraction Group Co.Lda joint venture ho kompanhia Suhurama Developer, Unipessoal Lda ho numeru kontratu 182/MCI-2024 ho durasaun servisu tinan 2.
Merkadu Munisipal Baukau nee bainhira finaliza sei fo benefisiu ba vendedores sira hamutuk 879 kompostu tipu negosiu obralan 148, roupa loja 125, faan sapatu 87, sembako 146, sasan dapur 54, kolsaun 10, alfayate 14, faan sana rai 3, Tais Timor 7, faan telefone 15, barbershop 5, sasan eletroniku 9, kosmetik 13, faan osan mean 1, faan pulsa EDTL 2, faan aimoruk ba agrikultura nian 1, farmasia 1, faan naan karun no seluk tan 10, faan ikan 23, produtu lokal 200, no iha mini restorante 7.
(tom)
