BAUKAU, STLTIMORLESTE.com – Bispu Dioseze Baukau, Dom Leandro Maria Alves husu Governu kria dialogu, hodi solusiona fukun ba Ro’o Haksolok neebe tinan naruk ona seidauk fo haksolok ba Timoroan.
“Ita hatene ida nee buat ida sensivel tebe-tebes kabe ba ita nia nai ulun sira , buka atu halo dialogu neebe mak diak atu bele solusiona ita nia situasaun ida nee tuir justisa neebe iha nee, hau hanoin ita nia nai ulun sira hatene liu agora temi ona iha ona ingestigasaun, ita hotu-hotu hein hakarak buat hotu lao ho diak tuir justisa neebe mak iha,” hateten Dom Leandro iha Vila Antiga, Baukau, Kinta (16/0/10/2025).
Tuir Bispu Diozese Baukau nee katak, problema kona-ba Ro’o Haksolok sensivel tebes, tanba nee kompetensia tomak iha Nai Ulun sira atu solusiona liu husi dialogu no tuir dalan justisa Timor nian.
Maibe ba Dom Leandro problema Ro’o Haksolok daudaun iha ona prosesu investigasaun, nunee Povu Timor tomak hein hakarak buat hotu lao diak no tuir duni justisa neebe eziste iha Timor-Leste, tanba orsamentu neebe gasta ba Ro’o Haksolok ho montante boot, nunee husu Governu seriu ba asuntu Ro’o Haksolok.
“Ita nia nai ulun Governante sira ita haree too agora sira diskusaun manas tebe-tebes kona-ba realidade ida nee, ita hanesan sidadaun hein katak husi diskusaun sira nee bele hamosu lalais halo klarifikasaun diak ba povu sira hotu,” katak Dom Leandro.
Bispu nee komenta, prosesu Ro’o Haksolok daudaun Governante sira halo diskusaun makaas, tanba nee hanesan sidadaun hein rezultadu husi diskusaun sira, maibe tenke ho rezultadu klarifikasaun diak ba povu.
Nunee kona-ba diskusaun sira Dom Leandro fo fiar no komfiansa tomak ba Governante sira solusiona fukun Ro’o Haksolok, tanba Governu eziste tanba povu.
“Tau nafatin komfiansa ba sira husu sira ho maneira ho meneira neebe mak diak maneira neebe mak dignu atu nunee solusiona situasaun ida nee liu liu Ro’o Haksolok,” hatete Dom Leandro.
Jornalista: Tomas Reis
Editora: Carme Ximenes
