BAUKAU, STLTIMORLESTE.com – Bispu Dioseze Baukau, Dom Leandro Maria Alves husu Autoridade Munisipiu Baukau labele hamosu dezentendimentu entre negosiante sira.
Bispu Dioseze Baukau rekomenda nee bazeia ba ezijensia negosiante sira iha merkadu Tuanau neebe deskonfia Autoridade Munisipiu Baukau liu husi ekipa konjunta muda negosiante haree husi familia, tanba negosiante sira merkadu Vila Antiga, Beskem no Vila Nova muda ona ba merkadu foun Tuanau, maiba balun kontinua halo negosiu iha merkadu tuan Vila Antiga no Beskem.
Bispu nee hateten, muda negosiante sira husi merkadu tuan ba merkadu foun Tuanau, orientasaun husi Autoridade Munisipiu sira, maibe presiza haree kondisaun iha merkadu Tuanau, karik la sufisiente bele halo estudu, nunee labele hamate atividade negosiu husi negosiante sira.
Tanba daudaun negosiante balun kontinua halo negosiu iha merkadu tuan sira, tanba ema kompradores iha, enkuantu negosiante iha merkadu Tuanau menus kompradores.
“Ita haree sae liu leten ema la dun ba, iha nee mak ema barak, ida nee mak ita buka nai ulun sira bele haree ida nee halo didiak, atu nunee labele mosu dezentendimentu,” hateten Dom Leandro ba STL iha Vila Antiga, Tersa (08/04/2025).
Relasiona negosiante neebe kontinua halo negosiu iha merkadu tuan, Bispu Dioseze Baukau nee sujere ba negosiante sira tenke hetan autorizasaun husi Autoridade Munisipiu hafoin bele halo negosiu iha merkadu tuan, tanba la hetan autorizasaun bele hamosu dezentendimentu entre negosiante ho negosiante.
Mezmu daudaun negosiante balun kontinua faan iha merkadu tuan hanesan Beskem no Vila Antiga, tanba kauza husi kondisaun estrada ba merkadu grave hodi difikulta movimentu transporte publiku tula pasajeiru too merkadu Tuanau, maibe daudaun kondisaun estrada halo ona manutensuan bele fasilita ona movimentu transporte publiku too merkadu Tuanau.
“Agora ita hatene katak ho infraestrutura neebe iha, estrada sae ba rai lolon ba neeba mos diak ona, neebe ita hein katak merkadu neeba sei sai sentru ba negosiu,” katak Dom Leandron
Liga asuntu nee, STL tenta konfirma Prezidente Autoridade Munisipiu Baukau, maibe la fo komentariu.
(tom)
