BAUKAU, STLTIMORLESTE.com – Dom Leandro Maria Alves hamutuk Padre Manuel da Silva Ximenes inaugura kapela São João de Brito Liasidi, neebe lokaliza iha Suku Wailili.
Iha biban nee Bispu Diozese Baukau Dom Leandro Maria Alves ba jornalista STL iha Watubala Liasidi, Wailili, Sabadu (08/11/2025) hatete, ohin halibur hamutuk hodi inaugura kapela Liasdi.
“Ohin ita hamutuk iha Liasidi atu inaugura kapela nee nia padroera mak São João de Brito, kapela ida nee tuir istoria katak kleur tebes ona mak harii depois ema sunu tiha, ohin ita rona istoria nee, hodi hatudu sarani sira nia domin iha Nai Maromak, maske sira liu iha nee maibe sira nia fiar sira la husik, sira kaer metin nafatin,” dehan Bispu.
Bispu dehan, ema ida neebe harii kapela nee uluk lo-loos sai padre ona maibe tanba Maromak bolu hikas ona nee mak padre Jacinto, kapela ida nee hatudu katak kapela neebe istiriku.
“Ita agradese tanba sarani sira hatudu sira nia domin, sira kaer metin nafatin sira nia fiar hodi kontinua ho maneira oin-oin harii fila fali kapela foun ida nee, ida nee hatudu sira iha fiar neebe boot tebes ba Nai Maromak,” dehan Bispu.
Nunee mos Padre Manuel da Silva Alves hatutan, kapela ka igreja nee uma orasaun, uma neebe ema hasoru malu ho Maromak, nee duni koko halibur hamutuk iha uma sagradu ida nee.
“Nee duni hau konvida sarani neebe pertense ba sentru pastoral São João Brito Liasidi koko atu haburas no hafanu imi nia fiar, atu nunee igreja foun neebe iha laos igreja mak furak maibe ema neebe moris iha igreja laran tenke furak,” dehan Padre Manuel.
Amu Paroku nee dehan, igreja nia furak nee hatudu husi ema idak-idak nia hahalok, tanba nee remata selebrasaun misa kuda mos ai, tanba iha mos dezentendimentu iha sentru nia laran, tanba nee mak husi kuda ai ida nee, ema hotu-hotu bele moris iha unidade, dame nia laran.
Tanba nee konvida sarani sira koko atu aprosima nafatin, kuandu padre sira mai misa mai partisipa ho diak, tanba kapela nee halo ba sarani sira, laos ba animal, tanba sarani mak nuudar Maromak nia ilas, Maromak nia lalatak, mai aprende Maromak nia liafuan.
Padre dehan, kapela nee tuir istoria 1975 kuandu indonezia tama kapela iha ona, maibe kapela ho uma duut depois ema sunu tiha, indonezia iha TL la hadia no ukun aan tiha mos la hadia no foin lalais iha tinan 2019 nee mak hadia fila fali, no igreja nee iha kedas igreja tuan nia fatin, aumenta deit medidas.
Orsamentu neebe harii kapela nee gasta ho total rihun US$ 26 resin. Orsamentu nee kontribuisaun mai husi sarani sira, parokia, Karitas no seluk tan.
kapela São João de Brito Liasidi inaugura husi Dom Leandro Maria Alves, no akompanha husi padre, madre, Autoridade Lokal Suku Wailili, Xefe Aldeia Waimanuboe no Watubala inklui sarani sira.
Bainhira remata selebrasaun misa santa no inaugura kapela kontinua kuda ai oan nuudar simbolu domin, nunee sarani sira bele kuda domin ba malu no hadook husi violensia no hahalok aat sira, hadomi malu nuudar maun alin iha Kristu nia domin.
Jornalista: Emerenciana Pinto
Editor: Xisto Mendonça
