BAUKAU, STLTIMORLESTE.com – Papa Leão XIV neebe foin eleitu asentua makaas ba pas no promove dialogu iha mundu.
Bispu Dioseze Baukau, Dom Leandro Maria Alves sente kontente hafoin rona rezultadu husi konklave iha vatikanu, neebe hatudu sinal liu husi suar ai mutin sai husi kamine iha Kapela Sistina nia kakulun, ho rezultadu Papa eleitu ba lider igreja universal mak Robert Francis Prevost, naran Papa Leão XIV neebe asentua ba pas no promove dialogu iha mundu.
“Ita hatene, Amu Papa Leão XIV nia liafuan neebe koalia asentua makaas mos iha pas halo dialogu koalia ba malu, ida nee hatudu katak nia hakarak kontinua buat neebe mak Amu Papa Francisco husik hela,” dehan Bispu Dioseze Baukau, Lendro.
Bispu Dom Leandro haktuir, Papa eleitu Robert Francis Prevost ho naran Papa Leão XIV, hakarak kontinua obra Sua Santidade Papa Francisco, reforsa pas no promove dialogu iha mundu liu husi bolu atensaun ba ema hotu atu harii pas, tanba pas mai husi ema idak-idak nia fuan.
Nunee Dom Leandro husu sarani hotu tau konfiansa ba Papa Leão XIV, ho Papa Leão XIV bele kria dala dame iha mundu, kombate konflitu sira neebe daudaun mundu enfrenta.
“Papa Leão XIV mosu nee bele dehan esperansa, ita rona liafuan primeru nia sita, keta tauk fo liman ba malu, harii pas, husu ita atu sai igreja neebe hanesan ponte fo liman ba malu entre ita ho ita, ita ho Nai Maromak,” Dom Leandro akresenta.
Ho prezensa Papa Leão XIV, Dom Leandro lori sarani nia naran agradese ba Maromak, tanba hafoin Papa Francisco husik sarani Katolika tomak iha mundu fila hikas ba Maromak, sarani sira lakon Aman, maibe hafoin liu husi Konklave iha ona Papa eleitu tuir profeta Jeremias Kapitulu 3 Versiklu 15-17 neebe katak, “Hau sei haraik ba hau nia ema ba imi tuir hau nee nia fuan”
Nunee Amu Papa eleitu sidadaun Amerikanu nee mak tuir Maromak nia fuan ba Sarani Katolika iha mundu.
“Hanesan sarani alegria, nee mak alegria boot tebes, tanba liu husi nia guia nafatin ita nuudar susesor São Pedro nian guia ita ba dalan hasoru Nai Maromak, Papa Leão XIV sai esperansa ba ita,” katak Dom Leandro.
Entretantu Konklave nee partisipa husi kardinal nain 133 iha mundu hili papa foun ba dala 267 lidera igeja universal.
(tom)
