DILI, STLTIMORLESTE.com – Arsebispu Metropolitana Dili, Dom Virgilio Cardeal do Carmo da Silva, SDB agradese ba Aman Maromak tanba fo ona Amu Domingos Maubere hanesan aman ida no modelu figura ida ba nasaun Timor Leste (TL), tanba nee sarani Katólika lakon figura diak.
“Ita agradese ba Aman Maromak neebe fo ona Amu Domingos Maubere mai ita, los duni laran susar, tanba ita lakon Amu Domingos iha ita hotu nia leet, mais ita agradese ba Aman Maromak tanba nia fo nuudar aman ida modelu ida no figura ita hotu admira ba ita nia rain,” hatete Arsebispu Metropolitana Dili, Dom Virgilio Cardeal do Carmo da Silva, SDB ba jornalista sira iha iha sala Mortuariu HNGV, Sesta (16/05/2025).
Nia dehan, sarani sira agradese ba Ministeriu Saúde no Mediku nomos pesoal saúde iha HNGV nomos iha ospital rai liur neebe durante fo ona tratamentu ba Amu Domingos Maubere nia saude durante nee too ohin loron.
“Ita hotu hakarak Amu Domingos re-koopera nia saude ho diak, hakatak salva ita nia Amu maibe ita nia forsa la too, ikus ita labele manan nia moris, maibe ita hotu agradese tanba hakarak salva, tanba nee agradese ba mediku iha ICU nian,” nia deklara.
Nia esplika, Amu Domingos Maubere nia iis kotu iha ICU, ohin Primeiru Ministru Kay Rala Xanana Gusmão mai too iha sala ICU no molok mai lori ba iha Kapela Nossa Senhora de Lourdes Hospital Nasionál Guido Valadares (HNGV) no sarani sira halao reza ba Amu.
“Husu sarani sira kontinua reza, nudar hatudu sinal domin ida ba nian, kontinua reza ba nia atu nunee husik hela matak malin ba ita hotu neebe sei moris hela,” nia informa.
(jen)
