DILI, STLTIMORLESTE.com – Arsebispu Arkedioseze Metropolitana Dili, Dom Virgilio Kardeal do Carmo da Silva, SDB ohin meudia nee dezloka ba Vatikanu hodi partisipa serimonia funebre Maktoban Santu Padre Papa Francisco nomos partisipa reuniaun Kardeais hodi hili fali Papa foun.
Arsebispu Arkidioseze Metropolitana Dili, Dom Virgílio Kardeál do Carmo da Silva, SDB hateten, nia hetan Karta Ofisial ida husi dekanu kardeal sira nian, hodi Kardeal sira hotu halo reuniaun atu prepara halo eleisaun ba Papa foun.
“Tanba pedidu iha nee mak hau aselera hau nia viajen ba Roma, viajen primeiru atu ba tuir serimonia funebre neebe mak orariu seidauk fo sai, Segunda ida hanesan nee, konvite hau dehan, hahu ona Kardiais sira neebe mak prepara atu tuir halo eleisaun ba Papa foun nian hahu ona halo enkontru,” hateten Dom Virgílio Kardeál ba jornalista sira iha Sala VVIP Aeroportu Internasional, Nikolau Lobato, Komoro, Dili.
Kardeal nee hateten, ho Sua Santidade Papa Fransisco nia mate, horiseik lokraik nunee karta ida mai husi Dekanu Kardeal sira nian, atu konvida Kadeal sira hotu atu halo enkontru hodi hili Amu Papa foun iha tempu oin mai.
Enkuantu serimonia reuniaun Kardeais nee hahu iha loron ohin, nunee Dom Virgilio Kardeal do Carmo da Silva sei partisipa iha Kinta semana nee.
Nia hatutan tan katak, iha reuniaun nee Kardeal sira halibur hamutuk hodi hili fali fali Papa ida neebe mak iha fuan boot, matenek no santidade hodi bele lidera Igreja Katolika nee ba oin.
“Igreja los duni kuandu iha Papa ida mate Kardeais sira nafatin halibur hamutuk atu reza hodi hili fila fali, husu ba Nai Maromak atu fo fali Papa ida ho fuan boot iha hanoin atu oinsa nia matenek ninia santidade hodi kontinua lori igreja katolika lao ba oin,” hateten Dom Virgilio Kardeal.
Dom Virgilho Kardeal hateten, iha mundu ohin loron ita hatene iha situasaun oin-oin, nunee ita igreja katolika presiza figura ida, Amu Papa ida neebe mai ho nia figura ida nia matenek, nia esprensia, nia santidade, hodi kontinua lori igreja katolika agora daudaun nee.
Tanba nee Kardeal husu sarani sira atu kontinua halo orasaun, mezmu sarani sira la bele partisipa iha Roma, maibe sarani sira nia orasaun bele ajuda kardeal sira, bele halao diserimentu nee ho diak hodi nunee bele hetan Papa foun.
(EST 3)
