DILI, STLTIMORLESTE.com – Arsebispu Arkedioseze Metrolpolitana Dili, Dom Virgilio Kardeal do Carmo da Silva, SDB hatoo sentidu kondolensia ba Madre sira husi Kongregasaun SSpS, tanba lakon belun diak ida Madre Maria Bernadette SSpS, neebe Nai bolu hikas ona iha kadunan Santu.
Madre sira husi Kongregasaun Servarum Spiritu Sancti SSpS sente triste tanba lakon Madre diak ida, Madre Maria Bernadette Maunutt SSpS neebe Nai bolu hikas ona iha Nai nia kadunan Santu.
Madre Maria Bernadette moris iha Besnaem Kefa, iha loron 12 Fevereiru tinan 1935, hahu tama iha aspirante iha Atambua, iha loron 8 fulan Dezembru 1953, no votus primeiru iha Halulik iha loron 22 Agostu 1956, no halao votus perpetua iha Halilulik Atambua iha loron 16 fulan Julhu 1964. No ikus Nai bolu hikas ba Nainia kadunan Santu iha loron 14 fulan Marsu tinan 2025.
Iha biban nee, Arsebispu Arkedioseze Metrolpolitana Dili, Dom Virgilio Cardeal do Carmo da Silva, SDB liu husi selebrasaun Misa Requiem iha Igreja São Tiago Hera hatoo sentidu kondolensia ba Madre sira husi Kongregasaun SSpS, tanba lakon Madre diak ida Madre Maria Bernadette SSpS neebe durante nee dedika nia aan hodi haklaken Nai nia liafuan ba sarani sira.
“Uluk knanain hodi hau nia nia naran, hodi dioseze nia naran hakarak hatoo ami nia sentidu kondolensia ba familia boot SSpS, laos deit familia espiritual, maibe hau fiar katak iha ita nia leet familia raan ninia mos, tanba nee hau hatoo sentidu kondolensia ba familia raan nia husi Kefa, neebe oras nee sente triste laran susar tanba madre Maria nia aujensia,” dehan Arsebispu.
Kardeal dehan, Madre Maria Bernadette durante nee laos husik deit nia liberdade sai relijioza, nee duni primeiru nia aprende mate ba nia aan atu sai relijioza konsagrada, no laos sai deit konsagrada ida maibe halo tan opsaun ida misionariu.
Madre laos husik nia liberdade tomak tuir Kristu too mate, maibe nia mos husik familia nia rai no nia ema sira neebe nia hadomi tuir rai ida neebe Nai Maromak husik ba nia hodi halao nia misaun iha Timor Leste.
Dom Virgilio Kardeal agradesimentu boot ba Maromak no agradese ba madre ba nia vokasaun boot rua nee konsagrada I misionariu neebe halo durante nee.
“Ita nia rai Igreja Timor, ita deve buat barak husi misionariu husi sekulu 16 ba kotuk too ohin igreja Timor mos selebra ona tinan atus lima resin tanba sakrifisiu no didikasaun, I misionariu barak mos fakar duni sira nia raan ba igreja no povu ida nee nia fiar, ita agradese ba Maromak no ba Madre Maria ba nia sasin konsagrada no misionariu,” katak Bispu Dom Virgilio.
Nunee mos Madre Provincial SSpS Timor Leste, Madre Isabel Maia do Rego SSpS hatete, Nai mak haraik no Nai mak foti fila fali hahi Nai nia naran, job 1: 21.
Madre Provinsial SSpS Timor Leste dehan, Maria Bernadette ema neebe fuan livre husi buat hotu ba Maromak nia providensial, nia moris tuir Santa Bernadette neebe hahoris Nai feto Maria, nia moris Virjen iha Nai nia futar oin, nia moris moos, hatudu nia simplisidade laran maus no laran midar ho ema se deit hamnasa oin midar ba ema hotu, laos ba Madre SSpS no Amu SVD deit, maibe Nai lulik Diosezanu lubuk ida relijiozu sira neebe mak iha Hera, no ema hotu konhese diak se mak madre Maria Bernadette.
“Madre Maria Bernatte laran diak no diak ba ema hotu, sarani mota kiik sarani Hera, Akanunu sentru parokia lubuk ida hatene Madre Maria Bernadette nia prezensa no sasin moris, no Avo Bernadette moris ho vida agrikultor ho Santa Bernadette nia hadomi no kuida aihoris, halo hakiak aihoris haleu uma novisiariu SSpS Hera,” katak Madre.
Madre Provisial nee hatutan, Madre Bernadete nuudar ema fiar Nai moris ho esperansa ba Maromak, iha tempu neebe Madre moras labele halo buat ida nia sempre hatete hau labele halo buat ida buat neebe hau bele halo mak reza ba madre sira neebe ativu, no sempre temi Bapa Bapa Bapa, depois reza ami aman too hotu.
Iha biban nee Madre mos hatoo agradese wain ba Amu Kardeal ho nia sakrifisiu mai selebra misa Requeim no akompanha prosesu funebre hodi entrega fila fali Madre Maria Bernadette ba Maromak Maromak moris nain, no agradese mos ba Familia neebe ho laran luak oferese nia oan feto laran diak hodi serbi iha nain, liu husi kongregasaun SSpS, no hatoo obrigada mos parte hotu neebe prezensa iha selebrasaun misa, no parte hotu neebe apoiu lojistika, no parte hotu iha selebrasaum Misa too prosesu funebre.
Nunee mos Konselhu Provinsia Indonezia Timor Indonezia, Madre Aloysia SSpS hatutan, Madre Bernadette maske Nai bolu hikas ona iha Nai nia kadunan Santu, maibe Madre husik hela memoria neebe labele haluha nakonu ho domin ba madre no padre sira iha Timor Leste.
Madre Bernadette ema neebe misionariu sejati neebe sempre korajen ema ba dalan los nia, husi orasaun ba Nain feto no Nain Jesus iha nia orasaun.
(eme)
