DILI, STLTIMORLESTE.com – Arsebispu Metropolitana Dili, Dom Virgilio Cardeal do Carmo da Silva, SDB hatoo obrigadu ba amu Domingos Maubere, tanba sai ona Amu vokasaun ba iha Timor, hodi prepara foinsae sira ba amululik no madre.
Misa Funebre Amu Domingos Maubere Prezide husi Arsebispu Metropolitana Dili, Dom Virgilio Cardeal do Carmo da Silva, SDB akompanha husi Dom Norberto do Amaral nomos Dom Leandro Maria Alves.
Iha omilia Dom Virgilio hatete, Amu Domingos luta aman ba nasaun nian iha Parokia neebe halo misaun ba, nia kria grupu kategorial hodi prepara adolsente no foinsae ba Nailulik no Madre, tenke rekonhese katak nia oferese ba Igreja Madre no Padre lubuk ida, nomos leigos barak, maibe grupu nasional instuisaun importante ba rai ida nee, iha fatin neebe deit nia vizita nia bolu nafatin familia atu oferese be-oan ba igreja hodi servi nuudar amululik no madre konsagradu konsagrada.
Amululik sai fini nasaun nian, oras nee buras iha rain doben Timor no nia sei kontinua xave lalehan hodi tau matan no harohan ba nia amululik no madre hodi kontinua lao tuir nia dalan, hatete Dom Virgilio.
“Tan nee loron ida hau dehan deit obrigadu Amu Du, tanba sai ona Amu vokasaun nian ba igreja iha Timor, Amu Du hatudu nia domin ba kiak no kbiit laek hodi foti inisiativa loke dalan ba labariik kiik oan no foin sae sira nia edukasaun no formasaun atu prepara lideransa foun ba kreda no ba nasaun, nuudar Timoroan nia hadomi rai ida nee sasukat laek, ho nia kontribuisaun importante hodi luta ita nia autonasional nia lori naran Maubere tulun nia aan no niat hotu neebe nia halo ba rai ba ema Timor, hatudu duni katak nia nuudar Timoroan, Maromak oan, Maubere oan, fo aan tomak ba rai ida nee, nia diak eh moras laran nia la haree nia kondisaun moras mos nia la haluha atu reza ba Timor atu sai diak liu tan, reza ba lider sira tur hamutuk tau hamutuk hanoin atu bele dezenvolve rai doben Timor,” hatete Dom Virgilio liu husi nia omilia wainhira prezide misa Funebre Amu Domingos Maubere iha Katedral Dili, Segunda nee (19/05/2025).
“Amu Maubere obrigadu ba ita nia domin ba rai no povu ida nee, kontinua harohan mai ami, liu-liu sira hotu rai nian atu hatene moris iha unidade hodi servi pas ba malu iha luta foun nasaun Timor sei lori ba oin,” hatete Dom Virgilio.
Dom Virgilo haktuir, saida mak ita halo ba ita rain no ba ema seluk sei ba nafatin, sei hatutan fali husi jerasaun ba jerasaun foun sira.
Amu Maubere hadomi liu povu no oras nee nia husik ba jerasaun foun sira, ba amululik Bispu, Madre nomos sarani atu kontinua hamoris misaun neebe husik hela, atu hakerek iha nia istoria atu konserva haktuir nafatin ba jerasaun foun tuir mai ho husu tama iha istoria rezistensia nia.
Amu Du ita fo adeus ikus ba nia, husi oin ba oin nia la hamutuk tan ho ita, nia la hakilar tan Gaudete Et Exsultate hamutuk ho ita neebe oras nee daudaun hamorin, iha neeba nia sei haksolok no hahi Maromak ba nafatin, nia nafatin harohan nain ida ba ita hotu moris iha rai ida nee.
Iha misa Funebre nee Prezidente Republika, José Ramos Horta fo kondekorasaun ba Padre Domingos Maubere.
Partisipa iha misa Funebre nee Prezidente Republika José Ramos Horta, Eis PR Francisco Guterres Lou Olo, Eis Primeiru Ministru Mari Alkateri, Eis Prezidente Tribunal Rekursu, Deollindo dos Santos, Ministru Agrikultura Pekuaria Peskas no Florestas (MAPPF), Marcus da Cruz, Sekretariu Estadu Kooperativas SECoop, Arsenio Pereira da Silva nomos governante sira seluk, menbru Parlamentu Nasional, Madre, Frater sarani sira, depois de misa sarani humutuk ho Padre, Bispu no sarani sira haloot maktoba Amu Domingos Maubere iha semiteriu Maloa Ailok Laran.
(joa)
