DILI, STLTIMORLESTE.com – Arsebispu Arkedioseze Metropolitana Dili, Dom Virgilio Cardeal do Carmo da Silva, SDB husu sarani Timor Leste reza ba Sua Santidade Papa Francisco atu rekupera husi moras Pneumonia.
Dom Virgilio hatete, ohin loron sanulu resin rua Amu Papa iha hospital, situasaun agora moras todan oituan, maibe mediku sira fo nafatin esperansa katak sei iha rekuperasaun.
Tanba nee, nuudar sarani iha ligasaun besik los Amu Papa Francisco, prosimidade da nee esperiensia iha loron 9-11 Setembru 2024, ho nia vizita nee halo Timor sente besik los ba Amu Papa.
“Iha situasaun difisil neebe Amu Papa agora enfrenta, konvite ida ba ita sarani sira atu reza ba Papa Francisco, konvida ema idak-idak reza tersu iha familia, iha misa sira, hanoin atu ita nia sakrifisiu loron-loron, kolen, kosar, malirin sira, buat hirak nee hotu hanesan sakrifisiu neebe oferese karan ida ba Maromak hodi husu atu Maromak bele hakmaan no tulun atu hetan mediku neebe diak liu hodi rekupera lalais Amu Papa nia saude,” hatete Arsebispu Arkedioseze Metropolitana Dili, Dom Virgilio Cardeal do Carmo da Silva, SDB ba STL iha Konferensia Episkopal Timorense (CET), Bidau Santa Ana l, Tersa nee (25/02/2025).
Bibi Atan Uma Kreda husu ba sarani sira hamutuk, liu husi idak-idak nia orasaun, fiar katak Maromak bele hatan ba ita nia preokupasaun ida nee.
Dom Virgilio afirma, iha Timor seidauk hanoin reza hamutuk iha igreja, tanba servisu idak-idak ninian, seidauk too atu halibur ema hotu-hotu atu reza, tanba tempu udan hirak nee, maibe iha misa Domingu-Domingu no misa iha dader-dader familia idak-idak halo orasaun, lao hamutuk nuudar komunidade boot ida atu misa iha Katedral, maibe nafatin korajen atu familia idak-idak bele reza iha familia dader iha misa, iha Igreja sira kontinua halo misa ida nee.
Entretantu Papa Francisco, dezde Sesta (14/02/2025) too agora sei halo hela tratamentu ba nia saude iha Hospital Gemelli, Roma, tanba sofre moras Pneumonia iha nia pulmaun, neebe rezulta nia kondisaun kompleksu oituan.
Antes nee Papa Francisco susar dada iis kauza husi moras Bronkitis no infesaun polimikroba, neebe halo nia kondisaun grave liu. Papa Francisco agora daudaun hetan tratamentu antibiotiku no ho terapia.
Vatikan kansela hotu ona ajenda ofisial Papa Francisco too semana oin hodi bele garante nia kondisaun bele rekupera lalais.
Maske Papa Francisco hasoru problema oin-oin relasiona ho nia saude dezde 2021 hanesan hernia, intestines (tee-oan boot), no moras iha nia ain tunur neebe halo nia tenke uza kadeira roda, Papa Francisco hatudu forsa nafatin ba nia aan no husu sarani Katoliku iha mundu reza ba nia iha faze susar hanesan agora nee.
(joa)
