DILI, STLTIMORLESTE.com – Arsebispu Metropolitana Dili, Dom Virgilio Kardeal do Carmo da Silva, SDB husu ba sarani sira matan moris neon nain, labele monu ba tentasaun no nafatin fiar ba iha Nai Maromak.
“Hau hakarak fo hanoin ba sarani sira hotu, iha tempu Kuarezma bolu ita sarani idak-idak atu matan moris neon nain, matan moris neon nain atu ita la sente influensiadu ho ema oin-oin, hanorin oin-oin neebe mosu mai ho dalan oin-oin hakarak atu desfia hakarak dada sarani balun neebe hanoin hakarak ba iha neeba, hakarak konvida sarani sira atu fiar metin nafatin keta monu tuir saida deit mak ema koalia, idak-idak buka hatene tuir nia fiar, bolu sarani sira atu fiar metin nafatin ba ita nia fiar nuudar sarani, lalika rona buat hotu, tanba boot mai toman ida nee, hatene ita nia Igreja ida neebe no sarani iha neebe, tanba nee atu matan moris nafatin,” hatete Dom Virgilo iha Igreja Katedral Dili, Kinta nee (10/04/2025).
Dom Virgilio informa, hanoin nafatin mos Amu Papa Francisco nia vizita iha fulan Setembru 2025, Amu dehan kuidadu ho lafaek, hanoin ida nee mak formas oin-oin neebe mai atu desfia sarani nia fiar, bele mos hakarak sobu uma kreda ho dalan oin-oin no hakarak sobu unidade Igreja iha Timor, agora ema hotu haree daudaun akontese komesa deskonfia malu, koalia aat malu, tan nee buka matan moris nafatin atu labele tuir, tanba atu tuir nee foti desizaun buat neebe hau hakarak hili.
Tanba fiar doutrina Igreja Katolika mos fo hanoin ba sarani sira katak, wainhira sarani ida hamriik publikamente deklara nia aan katak hau agora sai membru ida nee, Igreja la kondena, maibe nia mak deklara nia aan atu sai husi Igreja, otomatikamente nia laos sarani, nia la pertensia ona ba Igreja Katolika Roma ninian.
Tan nee hakarak husu ba sarani sira, buat hirak nee mosu rona sira koalia, lalika uza violensia hasoru maibe ho kakutak malirin hakmatek atu bele hanoin halo desizaun neebe diak, tanba nee iha kuarezma konvida ema hotu atu reza atu ita hakmatek, ”Se mak nee keta halo forma aseita foun ida tama iha ita leet ho naran ida nee, maibe hakarak ho finalidade ida hamis ita nia Igreja, atu hamis ita nia unidade no hamoris ita nia identidade nuudar sarani,” hatete Dom Virgilio Kardeal.
(joa)
