DILI, STLTIMORLESTE.com – Arsebispu Arkedioseze Metropolitana Dili, Dom Virgilio Cardeal do Carmo da Silva, SDB hatoo mensajen Natal 2024 no tinan foun 2025, husu sarani sira loke fuan ba ema hotu, fuan neebe hatene haraik aan, perdua malu, hatene fo perdaun, hakuak malu no harii dame ba malu.
Nia dehan, tinan-tinan wainhira sarani selebra loron boot sira, liu-liu hanesan agora Natal, Santa Kreda la kolen buka sarani idak-idak atu hola konsiensia fila ba Nai Maromak.
Nee mak prezente boot Nai Maromak halo ba umanidade tomak sei halo los sa, tan nee mai lao hamutuk iha kreda ida no espiritu sinodal nian, Sinodo Bispu sira nian bolu atu lao hamutuk iha kominaun, partisipasaun no misaun, tanba batizmu halo ema sai ida deit, ema hotu mesak maun alin bin no feton iha Kristu Jesus.
“Natal konvida ita sarani idak-idak hakaas aan atu loke luan liu tan ita nia tenda, tenda mak saida, uma nia tatis, tenda mak Ita nia fuan, loke ita fuan ba ema hotu, fuan neebe boot hatene haraik aan, fuan neebe hatene husu perdua, hatene fo perdaun, fuan neebe hatene hakuak ema hotu no hatete harii damen,” hatete Arsebispu Arkedioseze Metropolitana Dili, Dom Virgilio Cardeal do Carmo da Silva, SDB liu husi mensajem Natal no tinan foun iha Camara Eclesiastica Lecidere Dili, Segunda (23/12/2024).
Tanba nee Natal bolu ema dala ida tan mai lao hamutuk, furak oinsa wainhira familia iha Natal lao hamutuk ba Igreja, basa familia mak kreda domestika, familia mak knuk sosiedade kompreende nian, tanba nee ema hotu sempre dehan wainhira familia forte kreda forte nasaun forte, nunee hanoin fali Amu Papa Francisco nia lia fuan kuidadu lafaek sira neebe hakarak sobu familia.
Tanba nee loron Natal hadia relasaun ho Maromak, relasaun ho maun alin sira, fulan hirak liu ba Amu Papa fo hanoin hela ba sarani sira liu-liu joven sira atu hadomi ferik no katuas, basa sira mak hun matenek nian, hadomi labarik sira, basa sira mak futuru rai ida nee nian.
Nunee iha mensajen Natal no tinan foun nee, Dom Virgilio husu ba politiku sira hadomi povu, povu mak tezouru riku soin rai ida nee nian, ba bispu, Padre no madre sira buka atu moris iha sarani no povu sira nia leet.
(joa)
