DILI, STLTIMORLESTE.com – Arsebispu Arkedioseze Metropolitana Dili, Dom Virgilio Kardeal do Carmo da Silva, SDB hatete, sarani Timor Leste sente laran todan no triste, tanba lakon Amu Papa Francisco.
Tanba nee, Dom Virgilio Konvida Amu Paroku sira hotu hahu aban dader halo misa ba Amu Papa Francisco iha kada Parokia idak-idak no Dioseze.
Amu Papa Francisco hakotu iis iha Roma, iha loron Segunda dader oras Roma nian, iha loron 21 Abril 2025, ho idade 88.
Dom Virgilio hatete, hakarak atu konfirma ba povu Timor tomak liu-liu sarani sira hotu kona-ba Sua Santidade Papa Francisco ninia mate, neebe foin rona, tan hakarak konfirma fila fali simu direitamente telefone ida husi Vatikanu mai husi Monsenhor Marco Sprizzi hodi fo hatene mai katak Amu Papa iis hotu tuir oras Roma Italia nian, tuku 07.35 oras Roma, Ita nia oras tuku 03.35 lokraik OTL.
“Notisia imida nee los duni halo ita hotu laran todan triste tanba ita hotu foin fulan hirak liu ba ita sente ninia prezensa iha ita nia leet, Papa fila husi Timor repete nafatin dehan katak hau nia fuan iha hela Timor, hau nia domin iha hela Timor, liafuan ida nee nia la koalia iha fatin barak, maibe iha Timor mak espresa ninia liafuan ida nee ba ita sarani, laos vizita foti nia liafuan maibe ita mos sente tebes-tebes Papa Fransisco ninia prezensa, ninia domin mai ita Timoroan sira iha loron tolu vizita iha iha nia leet,” dehan Arsebispu Arkedioseze Metropolitana Dili, Dom Virgilio Cardeal do Carmo da Silva, SDB liu husi Konferensia Imprensa, iha Camara Eclesiastica Lecidere, Segunda nee (21/04/2025).
Dom Virgilio hatete, nuudar ema laran triste laran todan tanba lakon Papa ida neebe ema hotu hadomi, nia mate los iha loron Paskua nian.
Nee duni ho sentimentu nee hotu ohin hakarak konvida sarani hotu reza ba nia, ohin hau koalia ona ho Prezidente Conferensia Espiscopal Timorense (CET), Dom Norberto do Amaral nia fatin mos atu hahu aban dader husu ba Amu Paroku sira atu iha Parokia hotu-hotu Iha Timor nia laran, hau hodi Prezidente CET nia naran hakarak konvida Amu Paroku sira hotu atu hahu aban dader iha idak-idak nia fatin, idak-idak nia parokia oferese misa espesial ida ba iha Sua Santidade Papa Francisco ninia klamar, nunee mos Bispu Dioseze idak-idak sei marka loron ida atu halibur kada dioseze iha idak-idak nia dioseze, atu halo mos misa ida espesial hodi hein bainhira mak loron funeral ninia,” dehan Dom Virgilio Kardeal.
Nia hatutan, husi Roma sei fo sai ba ema hotu, nunee mos sei marka loron ida ba loron funeral nian antes tuir disponibilidade dioseze idak-idak nia sei halibur nia paroku sarani sira hotu halo tan misa ida ba Amu Papa nia nuudar Dioseze idak-idak.
Dom Virgilio hatete, ida nee mak mensajen neebe Prezidente CET, Dom Norberto do Amaral husik hela mai komunika ba paroku sira hotu, fo hanoin mos paroku sira hotu katak hahu aban dader misa too Amu Papa nia naran la temi ema ida nia husik mamuk deit, fo hatene Amu Paroku hotu tanba Amu Papa mate ona hodi hein Simu fali Papa foun tuir mai.
Dom Virgilio informa, ba sarani sira hahu aban mos tuir toman oha fatin hotu-hotu ninian hanesan uluk wainhira Amu Papa Bento mate iha ita nia Nunciatura loke atu bele konvida nai ulun sira ho diplomata sira atu halo asina sei ba hakerek sira kondolensia ida nee sei komunika liu husi protokolu husi Nunsiatura nia sei halo Iha Lecidere.
(joa)
