DILI, STLTIMORLESTE.com – Dom Virgilio Cardeal do Carmo da Silva, SDB hatete, tempu adventu sarani sira prepara aan ho fuan hodi simu kosok oan Jesus.
Dom Virgilio Cardeal do Carmo da Silva, SDB hatoo liafuan nee ba jornalista bainhira remata halo enkontru ho Prezidente Republika Jose Ramos Horta, iha Palasiu Prezidensial Nicolau Lobato, Bairru Pite, Tersa (16/12/2025).
Dom Virgilio dehan, hela loron hira deit sarani sira iha mundu tomak festeja loron natal, maibe natal laos festa atu halibur malu deit, tanba nee hatoo mensajen ba joventude no sarani Timoroan atu prepara aan hasoru simu Jesus Kristu.
Dom Virgilio dehan, natal, hanoin liu konaba festa, hanoin kona-ba feriadu, muzika, dekorasaun natal ninian hotu neebe lao haleu, haree tarutu iha Dili laran, hotu-hotu hateke nabilan kalan nee haree nabilan ho ahi oi-oin deit. Nee hotu ajuda atu selebra natal.
“Maibe atu dehan deit katak iha tempu adventu ho natal katak, iha tempu adventu natal nee momentu furak ida neebe konvida Timoroan hotu, liu-liu ita sarani hotu, momentu ida hateke ba ita laran no fuan. Tanba natal nee koalia kona-ba domin, tanba domin Maromak halo an kiik, halo an kiak moris atu fo domin ida nee,” dehan Dom Virgilio.
Nia dehan, iha korajen ida atu hatene iha tempu adventu prepara aan ba natal, hatene fo tempu atu hateke ba laran, hateke fuan.
Nia hatutan, ho Kristu nia moris hias momentu oportunidade furak ida hafoun aan mak natal furak ba ida ema hotu, tan nee Dom Virgilio konvida sarani tempu adventu nee hodi hateke ba aan, laos hateke deit ba naroman sira, maibe hateke ba laran, i bele haree hetan aan mak bele ajuda konese diak liu tan hodi selebra natal.
Jornalista: Emerenciana Pinto
Editora: Domingas Gomes
