DILI, STLTIMORLESTE.com – Enkuantu joven ka foinsae sira hanoin hela kona-ba se mak sira atu fo ai funan, nunee iha Komoro Tasi Tolu aman ka tiu ida ho oin sin hela tanba loro matan dulas hela ninia roda tolu ho fuan neebe metin. Ba sira neebe dudu ka dulas hela roda tolu (karosa) loron Valentine laos deit kona-ba romatinku, maibe kon-ba domin neebe nakfilak ba foos, modo tahan, masin, mina no osan ba oan sira nia eskola.
Iha karosa laran nakonu ho dosi, bee aqua, rebisadu no seluk tan. Aman ka Tiu, Daniel Soares ida husi negosiante barak neebe faan iha tasi ibun, Sabadu (14/02/2026) hatete, loron nee nia hein nanis ona husi fulan kotuk, tanba nia iha esperansa ida katak sei hetan rendimentu neebe sufsiente hodi sustenta familia.
“Ba joven sira loron nee ba belun diak ka namora nian, maibe ami loron nee mak grasa, tanba ami bele hetan rendimentu neebe diak hodi sustenta familia,” dehan Daniel neebe fo hela bee aqua ba joven feto nain rua.
Iha tasi ibun nakonu ho ema, negosienta roda tolu sira sai hanesan bee matan ba joven sira, bainhira joven sira senti hamrok roda tolu sira mak salva, maibe liu husi sosa ho osan laos gratuita.
Maski ain kolen no liman metan tanba tur no dudu karosa haleu tasi ibun, sira nafatin hamnasa, tanba ba sira sasan neebe sosa husi joven sira nee hanesan ksolok kiik ida, sira laos deit faan sasan maibe sira faan hela ambiente, sira nia prezensa mak halo tasi ibun sai rame liu tan, tanba joven barak mak gosta ba hobur lisuk sira.
Bainhira loron matan hahu subar aan no foinsae sira hahu fila ba uma, negosiante sira nee sei tuur nafatin faan sira nia sasan, tanba loron Valentine remata sira sei la hetan lukru neebe barak tan.
“Ami kontinua faan sasan, tanba loron ohin nee mak ami bele hetan rendimentu diak, aban sira nee ladun ona,” dehan nia ho oin neebe kontenti.
Entretantu loron Valentine nee tasi ibun sai sasin ba relasaun domin husi joven sira, iha mos domin neebe sirkula iha roda tolu ka karosa nia laran, domin husi aman ka tiu ida neebe servisu todan hodi fo moris diak ba ninia familia.
(car)
