DILI, STLTIMORLESTE.com – Domingu Ramos tama ona ba semana santa sai pontu ba obra Maromak nian, husi Jesus nia terus no mate iha kruz hodi salva ema nia sala.
Lia hirak nee hatoo husi Amu Kapelaun CFP, Padre Abril Lopes liu husi nia omilia, bainhira prezide misa Domingu Ramos iha Kapela Sentru Formasaun Polisia, Komoro, Domingu nee (13/04/2025).
Nia esplika, ohin sarani sira kaer ramos iha liman hodi hananu dehan, rahun diak ba ida neebe mai hodi Nai nia naran, dame iha lalehan gloria aas tebes, husi Domingu Ramos nee tama ona ba semana santa.
“Ohin tama ona ba semana santa, semana santa mak sai pontu obra Maromak nian, semana santa hahu ho Domingu Ramos, ho Domingu Ramos ida nee ita rona evanjelhu rua neebe mai husi evanjelhu São Lukas kona-ba Jesus, ida premeiru ita rona husi misa hodi simu Jesus nuudar liurai, hotu-hotu hakilar hodi dehan rahun diak ba ida neebe mai hodi Nai nia naran, dame iha lalehan gloria leten aas ba,” hatete padre selebrante nee.
Nunee mos iha segundu neebe rona daudaun iha leitura iha misa haktuir kona-ba Jesus terus no nia mate.
Padre dehan, husi evanjelhu rua nee hatudu ba ema hotu sentidu Kristu nia vitoria nuudar liurai lo-loos, nomos iha evanjelhu São Lukas neebe mak rona fo sai kona-ba figura Jesus ida neebe lori dame supera indignidade husi ema Judeu sira prosesu tomak nia julgamentu neebe kontradis ho lei Jesus monu ho figura dame.
Jesus nuudar figura dame nian, maske Jesus terus oin-oin, maibe Nia sempre perdua ema neebe baku Nia, hodi dehan Aman perdua sira tanba sira la.hatene buat sa sira halo.
Padre dehan, Jesus simu terus laos nia sala no haree didiak husi Jesus nia terus no mate iha kruz laos sala husi nia aan, maibe Nia sai nuudar vitima husi ema sira neebe iha infernu.
“Maluk doben sira iha Domingu Ramos ohin husi sagrada eskritura husi evanjelhu saida mak bele foti ba ita nia aan, evanjelhu São Lukas fo hanoin mai ita modelu ita nia partisipasaun nuudar ema buka kontempla Jesus nia terus,” katak Padre.
(eme)
