KELIKAI, STLTIMORLESTE.com – Diresaun Risku Dezastre Naturais (DRDN) fanu komunidade sira iha Suku Bualale, Postu Administrativu Kelikai, Munisipiu Baukau, liu husi desiminasaun hodi komunidade sira hadook aan husi risku dezastre naturais.
Diretor DRND, Clementino Pedro Barboza esplika, kada tinan komunidade neebe afeta ba dezastre naturais rejistu iha Diresaun Risku Dezastre Naturais husi Munisipiu Baukau maioria husi Postu Administrativu Kelikai, tanba iha tinan 2024 komunidade afetadu liu 400 afeta ba dezastre naturais.
Afetadu liu 400 kompostu husi tipu dezastre anin sobu no inundasaun neebe resjistu inklui mos komunidade Suku Baulale, tanba impaktu husi mudansa klimatika.
“Iha Baukau, Kelikai mak nia numeru boot liu ba risku dezastre naturais, tanba impaktu husi mudansa klimatika, tanba nee ami funsionamentu knaar implementa programa nee iha Suku Bualale,” hateten Clementino ba jornalista sira iha Bualale, Sesta (21/03/2025).
Nia sublina, implementa programa risku dezastre naturais liu husi desiminasaun ba komunidade Suku Bualale, objetivu atu fanu komunidade sira hodi iha konhesimentu neebe bele prevene tesi ai, sunu rai arbiru, tanba iha impaktu ba mudansa klimatika neebe bele hamosu anin boot la tuir iklima, hodi estragus uma komunidade no uma lisan sira.
Aleinde mos fo hanoin ba komunidade sira atu prevene halo uma foho lolon, mota ninin inklui fatin neebe risku ba dezastre naturais.
Tanba antes nee komunidade sira laiha konhesimentu hodi tesi ai, sunu rai arbiru no halo uma iha fatin risku sira hanesan mota ninin no foho lolon, mak DRDN ezekuta tuir Diploma Ministerial 85/2023 loron 29 Dezembru neebe sita husi artigu 50 DRDN iha misaun atu fo hanoin ba komunidade sira prevene, tanba Estadu Timor Leste bandu sidadaun halo asaun neebe sita ona iha leten.
“Ita iha esperansa katak, liu husi informasaun nee sira bele intende halo preparasaun no halo mitigasaun, nunee bainhira dezastre boot ruma mosu kada uma kain iha responsabilidade ba nia aan,” nia argumenta.
Nunee mos Xefe Suku Bualale, Gabriela Belo da Conceição konsidera desiminasaun ba risku dezastre naturais nee importante, tanba bele ajuda komunidade sira hodi prevene ambiente hanesan la tesi ai no sunu rai arbiru hodi proteje Suku Bualale husi dezastre naturais nomos prevene komunidade sira hela iha fatin risku.
“Nee importante tebes ba hau nia komunidade, tanba bailoron anin boot bele sobu komunidade sira nia uma, nomos bele ajuda fo hanoin ba komunidade sira hadook aan husi fatin risku, tanba iha Bualale risku ba dezastre,” nia katak.
Enkuantu komunidade Norberto Freitas sente kontente ho desiminasaun refere, tanba bele ajuda komunidade liu-liu konhesimentu kona-ba prevene risku dezastre naturais.
(tom)
