DILI, STLTIMORLESTE.com – Autoridade Seguransa, Polisia Nasional Timor Leste (PNTL) liu husi Diresaun Servisu Investigasaun Kriminál (DSIK), ezekuta mandadu buska no apreensaun husi Tribunal Judisial Primeira Instansia Dili (TJPID) foti kareta neen (6) neebe pesoal autoridade Alfandega sira prende iha tinan 2024 asegura iha Portu Tibar.
Liu husi pajinal ofisial PNTL neebe STL asesu katak, durante ezekusaun Autoridade Seguransa PNTL-DSIK neebe lidera husi Xefe Seksaun Krime Organizadu Superintendente Assistente Polisia, Almero Quintas hamutuk ho ekipa DSIK dahuluk aprezenta mandadu buska no apreensaun husi Tribunal Judisial Primeira Instansia Dili (TJPID) ho NUC, 0066/26.PNSIC ba pesoal Alfandega sira neebe envolve iha prosesu prende kareta nee, molok kontinua halo kpordenasaun servisaun ho Jerente husi Timor Port nian.
Hafoin halo tiha koordenasaun servisu ho jerente Timor Port, ekipa DSIK hamutuk ho pesoal Alfandega sira akompanha husi kareta nain, kontinua kedas halo inspesaun ba kareta neen (6) neebe sai hanesan evidensia iha Portu Tibar, tansporta kedas mai asegura iha edifiu Ministeriu Publiku (MP) hodi hein prosesu kontinuasaun tuir mai iha Tribunal.
Entretantu iha prosesu buska no apreensaun foti evidensia kareta neen (6) hotu, ekipa DSIK mos kontinua bolu pesoal Alfandega balun neebe envolve iha kazu prende kareta hodi presta deklarasaun iha edifisiu Diresaun Nasional Investigasaun (DSIK) nia fatin, iha kuartel Jerál PNTL Kaikoli.
(jen)
