DILI, STLTIMORLESTE.com – Polisia Nasional Timor Leste (PNTL) liu husi Diresaun Tranzitu Seguransa Rodaviariu (DTSRN) fo treinamentu ba ofisial parajen iha loja sira oinsa huu arpitu hodi hapara kareta no motor.
“Imi nain 50 iha neeba nee atu halo alinhamentu no haree ba kareta no motor sira neebe para iha neeba,” hatete Diretor Diresaun Tranzitu Seguransa Rodaviariu (DTSRN), Superintendente Asistente Polísia, Luis da Costa ba jornalista liu husi nia diskursu sira iha Centru Formasaun Polisia (CFP), Kuarta (28/05/2025).
Nia dehan, kareta no motor sira neebe para iha neeba labele dader too kalan, ida nee laos para hodi hola sasan.
“Ami sei fo apoiu masimu ba imi nia servisu, karik buat balun nee persiza Tranzitu rezolve iha terenu ita sei ko’alia iha Grupu WhatsApp nian, karik ema para motor sala mak imi koalia ba nia lakohi halo tuir, tenke informa ba Tranzitu para ita mak rezolve,” nia informa.
Nia deklara Ofisal de Parajen nia prezensa iha loja oin atu hamenus engarrafamentu no kontrolu kareta ho motor para diak.
“Imi nia prezensa iha neeba nee atu kontrola kareta ho motor tenke para tuir linha, maibe imi haruka para diak laos imi atu husu osan ba sira,” nia argumenta.
Nia informa, atu rezolve engarrafamentu iha kapital Dili, hotu-hotu hatene katak engarrafamentu iha fatin nee kontribui husi ema hirak neebe mak ba kompras iha loja.
“Kapital Dili iha momentu neeba ita mos fo konvite ba loja nain sira husi terminal Bekora too terminal Tasi-Tolu hamutuk 220,” nia hatutan.
Nia koalia, Tranzitu Seguransa Rodaviariu mos servisu hamutuk ho kompanhia HEINEKEN neebe mak apiu masimu tebes iha programa saida deit.
Iha fatin hanesan, Tiago António Belo informa, Polísia Nasionál Timor Leste (PNTL) liu husi Diresaun Tranzitu Seguransa Rodaviariu Nasional (DTSRN) haruka sira mai tuir formasaun kona-ba kareta ho motor sira neebe tama sai husi loja.
“Polisia Tranzitu haruka ami mai tuir formasaun atu haree kareta no motor neebe tama sai ami nia loja, nomos tenke fo hatene sira para tuir linha,” nia afirma.
(jen)
