DILI, STLTIMORLESTE.com – Diresaun Tranzitu Seguransa Rodaviaria Tersa (01/6/2025) halo pasa revista ba transporte kareta no motor neebe funsionariu sivil ho membru Polisia Nasional Timor Leste (PNTL) neebe servisu iha Komando Jerál PNTL Kakoli.
Nia dehan, iha pasa revista nee DTSR konsege halo aprensaun ba membru PNTL nain 21 nian motorizada no kareta rua (2) inklui dokumentu hitu (7).
“Iha pasa revista nee ita prende membru PNTL nia motór hamutuk 21 no kareta 2 inklui dokumentu 7. Iha membru polísia nain 14 mak kumpri dever hodi selu ona iha banku ho osan hamutuk US$ 30.00 no hela infrantór 16 mak seidauk kumpri nia dever selu iha banku,” esplika Diretór Diresaun Tránzitu Seguransa Rodaviária (DTSR) Superimtente Assistenste Polísia Luis da Costa ba jornalista sira iha Komando Jeral PNTL Kaikoli Dili, Kinta nee (03/07/2025).
Nia esplika, husi motorizada membru polísia nain 21 maioria la tau asesoria, tanba balun la monta espellu no la lori dokumentu motor nian. Enkuantu dokumentu hitu neebe Tranzitu Seguransa Rodaviaria prende nee kareta 2 mak nia dokumentu mate, motorizada 5 mak nia karta kondusaun mate ona.
Luis informa, atividade pasa revista nee kontinua lao husi Diresaun Tranzitu Seguransa Rodaviariu ba membru polísia no ba ema sivil, tanba lei la haree ema nia estrata nia nee polísia ka sivil, lei nee trata ema hanesan.
“Hau hakarak reafirma tan iha Polísia Nasionál Timor Leste, Tránzitu Seguransa Rodaviária iha Munisípiu hotu-hotu katak lei nee vale ba ema hotu. Dala ruma públiku kestiona iha media sosiál katak PNTL dala ruma sira asegura malu, maibé hakarak afirma katak ita nia tratamentu hanesan,” nia informa.
Nia husu ba membru PNTL sira neebe kontra regra Tranzitu Seguransa Rodaviária nian tenke kumpri lei ba selu koima ho montante US$ 30.00, antes atu foti fila transporte hirak nee.
Iha fatin ketak, Akademista UNTL, Adérito da Silva deklara, lei kodigu estrada nee vale ba sidadaun hotu-hotu, tantu membru PNTL no F-FDTL, karik sira nia dokumentus mate ou la tau plat tenke prende no fo surat tilan atu nunee sira mos ba selu iha banku.
“Lei nee Timoroan hotu-hotu tenke kumpri, tanba atu membru PNTL ou membru F-FDTL tenke kumpri regras sira nee, ita hotu-hotu kontribui ba estadu liu husi ida nee,” nia afirma.
(jen)
