DILI, STLTIMORLESTE.com – Polisia Nasional Timor-Leste (PNTL) liu husi Diresaun Tranzitu Seguransa Rodaviariu (DTSRN) neebe servisu hamutuk ho Diresaun Nasional Transporte no Terrestre (DNTT), husu ba publiku katak kareta ho motor labele para iha dalan ninin liu minutu 5.
Diretor Diresaun Tranzitu Seguransa Rodaviariu (DTSRN), Superintendente Asistente Polísia Luis da Costa dehan, avizu neebe Diresaun Tranzitu Seguransa Rodaviariu (DTSRN) no Diresaun Nasional Transporte no Terrestre (DNTT) Implementa ba transporte publiku sira labele para iha dalan ninin liu minutu 5, sei liu ida nee sira sei foti motor ou kareta neebe para iha dalan publiku.
“Ita implementa ho rigorozu, tanba nee se deit maka viola nee ita prende, karik motorista sira mak laiha, ita hasai nia plat nee mekanizmu ida, no implementasaun agora lao ona,” hatete Superintendente Asistente Polísia Luis da Costa ba jornalista sira iha Komando Jeral PNTL, Dili, Kuarta (30/04/2025).
Nia tenik, durante nee publiku hotu-hotu la satisfás, maibe implementa no agora ema hotu-hotu aseita no aparisaun ba aktividade nee.
“Ita implementa hahu husi Rotunda Nicolau Lobato nian tesik mai Largo Lesidere nian,ema labele para kareta ho motor liu minutu 5, nee ita prende ona kareta no motor barak numeru hau seidauk bele fo sai,” nia deklara.
Iha fatin ketak, Motorista Filipe Rodriques informa, Polisia Tranzitu Seguransa Rodoviária ho DNTT nian avizu katak, komunidade neebe lori motor ho kareta labele para iha dalan ninin liu 5 minutu, nee diak liu, atu nunee prevene asidente nomos ingrafamentu iha sidade Dili.
“Avizu ona katak, ita labele para kareta ou motor iha dalan ninin labele liu 5 minutus, hau senti ida nee diak liu, atu nunee bele prevene mos asidente iha sidade nomos bele hamenus ingrafamentu,” nia afirma.
(jen)
