DILI, STLTIMORLESTE.com – Polisia Nasional Timor Leste (PNTL) liu husi Diresaun Tranzitu Seguransa Rodoviária Nasional (DTSRN) sei halo pasa revista ba estudante sira neebe utiliza motor, maibe laiha karta kondusaun sei prende hotu.
Diretor Diresaun Tranzitu Seguransa Rodoviária Nasional (DTSRN), Superintendente Assistente Polísia, Luis da Costa dehan, Polísia Nasionál Timor Leste (PNTL) liu husi Diresaun Tranzitu Seguransa Rodoviária Nasional (DTSRN) sei bolu mos inan-aman bainhira oan sira laiha karta kondusaun utiliza motor sei prende hotu, tanba inan-aman kontribui oan sira halo krimi.
“Ami sei halo pasa revista ba eskola oan sira neebe utiliza motor, maibe laiha karta kondusaun mak ami sei prende hotu lori mai iha Polísia Tranzitu, nunee ami husu inan-aman atu hakaas oan sira atu hetan karta kondusaun molok utiliza motor ba eskola,” hatete Superintendente Assistente Polísia, Luis da Costa ba jornalista sira iha nia knaar fatin Komando Jeral PNTL Kaikoli, Dili, Kuarta (02/04/2025).
Nia tenik, durante nee sira haree kontribuisaun husi inan-aman boot liu ba nia oan sira, tanba sosa motor fo ba nia oan sira, maibe la haruka oan sira ba trata karta kondusaun. Tanba inan-aman sosa motor ho folin karun maibé atu hasai karta kondusaun ho folin 20 labele, tanba inan-aman labele esforsu oan la hetan karta kondusaun.
Nia esplika, lei kodigu estrada numeru 6/2003 dehan ema neebe ho idade 16 inan-aman bele halo deklarasaun atu nunee nia oan bele halo karta kondusaun, tanba nee obrigatoriu tenke hetan karta kondusaun hafoin konduz motor.
Nia hatutan, maibe realidade estudante sira barak mak laiha karta kondusaun maibe konduz motor, tanba nee PNTL liu husi Polísia Tranzitu Seguransa Rodaviariu afirma iha tempu badak sei halo operasaun ba eskola hotu-hotu iha kapital Dili. Polísia Tranzitu tempu badak sei tama sai eskola hodi haree estudante sira neebe uza motorizada maibe iha karta kondusaun ka lae, se laiha mak Polísia Tranzitu iha obrigatoriu sei foti hotu motor iha eskola.
“DTSRN aviza ba estudante sira hotu atu bele book aan halo karta kondusaun, se lae mak ami sei tama Eskola Pre-Sekundaria too Sekundaria neebe iha kapital dili, ami sei tama sai hodi halo pasarevista,” nia informa.
Nia husu mos ba profesores sira atu koopera ho Polisia Tranzitu nia prezensa iha eskola sira, lalika paniku, tanba Polisia Tranzitu hakarak halo prevensaun. Tanba asidente iha kapital Dili kuaze labarik minoridade sira no sira laiha karta kondusaun maibe konduz motor no mos tula malu nain 2 nain 3 la uza kapasete.
Iha fatin hanesan, inan Maria Banca dos Santos informa, DTSRN tenke toma atensaun ba labarik minoridade neebe utuliza motor hodi movimentu ba mai iha sidade Dili, tanba labaraik balun uza ema nia motor hodi tula malu.
“Hau hakarak polísia tenke servisu makaas duni, hodi kontrola labaraik minoridade sira neebe utuliza motor halai tun sae, tanba motor sira uza nee dala barak ema nia sira uza, ami inan aman la hola motor fo ba sira, balun inan aman mak sosa fo ba, maibe polisia tenke halo pasarevista duni ba ida nee, atu nunee hamenus asidente iha sidade Dili,” nia afirma.
(jen)
