DILI, STLTIMORLESTE.com – Komando Polisia Nasional Timor Leste (PNTL) liu husu Diresaun Tranzitu Seguransa Rodaviariu Nasional (DTSRN) prepara ona atu halo batedores ba bainaka espesial VIP no V-VIP neebe mai partisipa komemorasaun loron proklamasaun independensia TL iha dia 28 Novembru ba dala-50.
Hatete Diretor Diresaun Tranzitu Seguransa Rodaviariu Nasional (DTSRN), Superintendente Xefe Polisia Antoninho Mauluta ba Jornalista sira iha Komando Jeral PNTL Dili, Kuarta (26/11/2025).
Nia tenik, agora daudaun iha ona orientasaun husi Komandante Operasaun mai iha Trânsito bazeia ba Komandante Jerál PNTL, Komisariu Jerál Polisia Henrique da Costa atu prepara ona ba loron 28 Novembru nian.
“Oras nee dadaun hau mos orienta ona ba operasional nian, prepara ona planu konaba batedores, tanba ami trânsito nasional ami nia servisu ho motór patrulla (batedores), tantu bainaka espesial (VIP no VVIP) ,”nia esplika.
Nia informa, Diresaun Tranzitu Seguransa Rodaviariu Nasional (DTSRN), simu ona pedidu husi Ministeriu Estrajeirus no Primeiru Ministru Myanmar sei too ona, tranzito prepara ona atu halo batedores ba nain ulun sira.
“Ita nia kareta nee iha maibe limitadu, liu-liu kareta ou motor neebe halo batedores. Se urizente dala ruma iha balun ita atu koloka kareta araska oituan, tanba nee ita husu karik iha mudansa ba orariu fo informasaun lalais, atu nunee ita atende ho lalais,”nia deklara.
Iha fatin ketak Akademista UNTL, Hermenegildo Freitas informa, kareta ho motor ba polsia tranzito nee importante teb-tebes ba sira, maibe governu la tau proprioridade ba Polisia nia servisu, tanba iha aktividade ruma iha Polisia Tranzito sira tenke halo batedores ba VIP no VVIP.
Jornalista: Jeniche da Costa
Editora: Domingas Gomes
